Шымкенттік теміржолшылар Дүниежүзілік денсаулық күнін атап өтті
ТЧЭ-32 Арыс локомотив пайдалану депосына қарасты ТД-16 Шымкент локомотив айналым депосы қызметкерлері арасында «Никотиннен – витаминге» акциясы өтті.
«Қазкөліккәсіп» ҚБ Шымкент филиалының ұйымдастыруымен 7 сәуір – Дүниежүзілік денсаулық күні құрметіне өткен шарада теміржолшылар алдымен спорт нұсқаушысы Е.Маньшинаның басшылығымен жеңіл сергіту жаттығуларын жасады. Содан кейін локомотившілер денсаулығын дәрігерлер тексеруден өткізді. М.Тынышбаев атындағы Шымкент көлік колледжінің студенттерінен құралған волонтерлар тобы болса акцияға қатысушыларға жеміс-жидектер мен витаминдер таратты. Денсаулық сақтау күні өтіп жатқан игі шара көптің көңілінен шығып, бірталай теміржолшы қалтасынан темекі қорабын шығарып, витаминге айырбастап жатты.
Дәл осы күні, яғни өткен жұмада «ҚТЖ-Жүк тасымалы» ЖШС Шымкент филиалының қызметкерлері де денсаулық күнін атап өтті. Бұл күні бірыңғай сары киім киген олар мотивациялық семинар-тренинг өткізіп, денсаулықты шыңдау үшін спортпен айналысуға, қоғамды белсенді болуға шақырды.
«Сары жұмада» күн бейнесіндегі іс-қимылдар жасап, достық флэшмобын биледік. Көпшілік бір сергіп қалды, көтеріңкі көңіл күймен тарасты», – дейді шараны ұйымдастырушы бөлімшедегі кадр қызметінің бастығы С.Тлеумбетов.
Сабира БАЙЗАХОВА, Шымкент
