Ешкім де ұмытылмайды
Бұрын ордалы Оңтүстік атанған Түркістан облысы мен Шымкент қаласында санаулы ғана соғыс ардагері Ұлы Жеңістің 78-ші көктемін көргелі отыр.
Ардагер теміржолшыларға Қазақстан темір жолы атынан тиісті құрмет пен қамқорлық көрсетілуде. Бүгінгі таңда Шымкент темір жолына қарасты мекемелер есебінде тұрған 5 Ұлы Отан соғысының ардагері бар. Олар – кешегі сұрапыл соғыстың көзі тірі майдангерлері, қазіргі ұрпақтың мақтанышы. Атап айтсақ, Бадам станциясында тұратын Қалмен Муратов, Арыс станциясынан – Рахим Исмайлов, Шымкент станциясынан – Мусавали Пернебаев, ВЧД30 Арыс вагон пайдалану депосы есебінде тұрған соғыс ардагері Исамахаммет Ахметов пен Кемел Аршеев аталарымызға 9 мамыр – Жеңіс күні құрметіне сыйлық толы себеттер сыйға тартылып, 50 000 теңге көлемінде қаржы беріледі. Сонымен қатар Ұлы Отан соғысы ардагерлерінің ерлік жолын жалғаған 21 ауған соғыс ардагері бар.
Елімізде жыл сайын қатары кеміп бара жатқан соғыс ардагерлерін қолдауға бағытталған түрлі акциялар арнайы жобалар жұмыс істеп келеді. Мысалы, «Жеңіс» жобасы Қазақстан бойынша қарияларға еріктілер көмегімен азық-түлік, медициналық дәрілер, үйге қажетті шағын жиһаздар беріліп келеді. Сонымен қатар жоба аясында қарттарымызға Қазақстан Республикасы мен ТМД елдері бойынша теміржол көлігімен тегін жол жүру мүмкіндігі бар.
Аталмыш жоба аясында 35 елді мекенде тұратын екінші дүниежүзілік соғыс қатысушылары мен тыл еңбеккерлері қатарында болған 1400 қарияға тұрақты түрде барып отыру, үйлері мен аулаларын жинауға көмектесу, жөндеу жұмыстарына қолғабыс ету, азықтүлік, дәрі-дәрмек, тұрмыстық заттар сатып алу қарастырылған. Сонымен қатар ерекше қажеттіліктері бар ардагерлер тұрмыстық техникамен, мүгедектік арбаларымен және есту аппараттарымен қамтамасыз етілуде.