Астана-1 вокзалында тырысқақ ауруының алдын алу жаттығуы өтеді
31 мамыр күні Астана-1 теміржол бекетінде тырысқақ ауруының белгілері бар науқас анықталған жағдайда орындалуы тиіс іс-шараларды пысықтау жаттығулары жүргізіледі, деп хабарлайды Rail-news.kz Көліктегі санитариялық-эпидемиологиялық бақылау департаментіне сілтеме жасап.
Әлемдегі карантиндік және аса қауіпті инфекцияларға, атап айтқанда тырысқаққа қатысты шиеленіскен эпидемиологиялық жағдайға байланысты 31 мамырда Көліктегі санитариялық-эпидемиологиялық бақылау департаменті Астана қаласының медициналық ұйымдары және теміржол кәсіпорындарымен бірлесіп, тырысқақтың таралуын болдырмауға арналған жаттығу өткізеді.
Оқу-жаттығудың мақсаты – Астана-1 бекетінде жолаушылар пойызында және теміржол вокзалында төтенше жағдайларды жоюға жұмылдырылған қызметтердің әзірлігі мен өзара іс-қимылын бағалау, аса қауіпті және карантиндік инфекцияларды тіркеу, атап айтқанда жолаушылар пойызында тырысқақ ауруын анықтау кезінде, төтенше жағдайларда санитарлық-эпидемиологиялық және эпидемияға қарсы және санитарлық-профилактикалық іс-шараларды жүзеге асыруды пысықтау.
Адамзат тарихында тырысқақтың 7 пандемиясы болды. Дүниежүзілік денсаулық сақтау ұйымының мәліметі бойынша, қазіргі уақытта Африка, Азия және Кариб теңізіндегі 24 ел індеттің өршуі туралы хабарлады. 4 айда әлемде 86 мыңнан астам адам ауырып, 1 600-ден астам адам қайтыс болды.
Апта сайын Қазақстанның мемлекеттік шекарасын 70 мыңға жуық жолаушы кесіп өтеді, оның 16 мыңнан астамы бірқатар аса қауіпті және карантиндік инфекциялар, соның ішінде тырысқақ ауруынан зардап шеккен Оңтүстік-Шығыс Азия елдерінен.