Жолдама сарапқа салынды (Фото)
Қызылордада жыл сайын теміржолшылар арасында өткізілетін «Қазкөліккәсіп» ҚБ төрағасының дәстүрлі бильярд кубогының жартылай финалы өтті.
Аймақ теміржолындағы барлық мекемелерден екі ойыншыдан жасақталған 8 құрама команда қатысқан тастаяқ туры москвалық бильярд талаптары негізінде жүргізілді. Ол дегеніміз, бильярд столының үстіндегі ойын шарларын тек қызыл түсті шармен ғана ұрып, қабырғалықтағы ойық-нысанаға түсіру керек. Спорт секторы Бақытжан Имбергенов кубок турнирінің екі жеңімпазы Павлодарда өтетін бәсекеде аймақ намысын қорғайтынын жеткізді.
– «Қазкөліккәсіп» ҚБ төрағасының дәстүрлі бильярд кубогы жыл сайын ұйымдастырылады. Биылғы кубокқа да үміткерлер іріктелуде. Бүгінгі ойынға дейін аймақтағы тораптық станцияларда іріктеу турнирлері өткізілді. Олардың жеңімпаздары бүгінгі додаға қатысып, бақ сынауда. Турнир москвалық бильярд тәсілімен өтетін болғандықтан барлық талаптар ескерілуде, – деді спорт секторы.
Ең кемі екі рет жеңіліс тапқан ойыншы ойыннан шеттетілетіні де ескертілді. Геометриялық дәлдік пен математикалық есептілікті қажет ететін тастаяқ осал ойыны емес. Бұған өзіне сенімділік пен ептілік, берік жүйке, арақашықтықты ойша сыза білу шеберлігі де керек екен. Осындай шеберліктерін паш ете білген мықты ойыншылар да анықталды. Қызылорда локомотив пайдалану депосының заңгері Марлен Ермекбаев жүлделі 3-орынды иеленсе, Қызылорда жол дистанциясы шеберханасының шебері Медет Шеров 2-орынды еншіледі. Ал Қызылорда магистральдық желі бөлімшесінің диспетчері Нұрдаулет Тлеуов барлық ойыншыларды ойсырата жеңіп, жеңіс тұғырына көтерілді және жолдаманы ұтып алды.
Турнир барысында Қызылорда қосалқы бөлімі кәсіподақ ұйымының қызметкерлері сервистік қызмет жасады. Жүлдегерлерге кәсіподақ ұйымы әзірлеген бағалы сыйлықтар мен кубок берілді.
