Ер адам темір жолда суицид жасады
Ақтөбе облысы бойынша меншікті тілші
Ақтөбе – Илецк бағытында келе жатқан №2680 жүк пойызының алдына жүгіріп шығып, жолға жатып алған ер адам мерт болды. Қайғылы оқиға 13 тамыз күні орын алды.
Жіңішке станциясы қызметкерлерінің хабарлауынша, 44 вагоннан тұратын 3462 тонналық транзиттік жүк пойызы орман белдеуінен оң жаққа қарай жылжып бара жатқан жолда адам өлімі тіркелді. Бейтаныс адам кенеттен жолға шығып, рельске жата кеткен. Қысқа қашықтықта машинист оқыс тежегіш бергенімен, қайғылы оқиғаның алдын алу мүмкін болмады. Тепловоз 50 км/сағ жылдамдықпен келе жатып, шұғыл тежеуді қолданған. Жағдай шұғыл түрде пойыз диспетчеріне, кезекшіге, станция басшылығына хабарланды. Оқиға орнына көліктегі полиция және жедел жәрдем қызметі шақырылды. Анықталғандай, суицид жасаған 38 жастағы Өзбекстан азаматы, ер адамның үстінен алкогольді ішімдіктің иісі шығып тұрған. Денесі сот медициналық экспертизадан өткізу үшін Ақтөбе қаласының облыстық мәйітханасына жеткізілді.
Оқыс оқиғадан кейін «ҚТЖ-Жүк тасымалы» АҚ «Батыс» филиалы Жіңішке станциясының бастығы Т.Сағыновтың төрағалығымен жедел кеңес өтіп, қауіпсіздіктің сақтау, темір жол бойына бөгде адамдардың жүруіне жол бермеу шаралары қабылданды.