Астанада теміржол өткелі жөндеуден өтті
![](https://rail-news.kz/uploads/2023/09/11/wRq75sFQy59gWwoPGY9IT77Lq0rXMQZgrbQO0enF.jpg)
![](https://rail-news.kz/img/noimg.png)
«Қазақстан теміржолшысы» газетінің тілшісі
Елордада үлкен айналма жолдағы теміржол өткеліне күрделі жөндеу жұмысы жүргізілді. Жаңартылған жол өткелі іске қосылса, қаладағы көлік қозғалысы айтарлықтай жеңілдейді деп жоспарланған.
Астанадағы үлкен айналма жолының 4-шақырымындағы теміржол арқылы өтетін өткелде күрделі жөндеу жұмыстары толығымен аяқталды. Былтыр бұл өткел апатты деп танылған еді. Бір жыл ішінде жобалық-сметалық құжаттама дайындалып, өткел құрылысын аяқтады. Жол өткелі жаңадан салынып, құрылымдары нығая түсті. Өткел 4 жолақтан тұрады. Үлкен айналма жолы өткелі арқылы көлік қозғалысының болжамды қарқыны тәулігіне – 19-20 мың.
Ұлттық компания ұсынған мәліметке сәйкес, күрделі жөндеу жұмыстарының нәтижесінде Р-10 тасжолының өткізу қабілеті артып, көліктер мен пойыздардың қозғалыс қауіпсіздігін қамтамасыз етпек. Елорда әкімдігінің хабарлауынша, осы айналма жол іске қосылса, қала ішіндегі кептеліс, жол іркілісі шешімін таппақ.