Автокөліксіз күн: жұмысқа атпен келді
«Қазақстан теміржолшысы» газетінің тілшісі
22 қыркүйек күзгі күн мен түннің теңелу күні ғана емес, Дүниежүзілік автокөліксіз күн. Бұл күні бүкіл әлем бойынша миллиондаған адамдар көліктерін үйлеріне қалдырып, қала бойынша қоғамдық немесе экологиялық көлік, велосипед, роликпен қозғалып, жаяу серуендеуге артықшылық береді.
«ҚТЖ» ҰК» АҚ филиалы – Магистральдық желі дирекциясының 10 000-нан астам қызметкері де атаулы күнге үн қосып, көліктерін тастап, баламалы қозғалу әдісін пайдаланды, яғни қоғамдық көлік, велосипед, электрлі самокатпен қатынап, енді кейбірі жұмысқа жаяу келді. Ал өңірлердегі магистральдық желі бөлімшелеріне қарасты дистанцияларда ата-баба салтын еске алып, сенімді көлік түрі атпен келгендер де болды.
Бұл күні өткізілген акция теміржолшыларға автокөліктердің қоршаған ортаға тигізетін кері әсерін еске түсіріп, адамдарға баламалы көлікті пайдалану қажеттілігі туралы ой салды.
– Менің көлігім бар, бірақ мен Көліксіз күн акциясын қолдап, көлігімді үйге тастап кеттім. Бұндай күннің болғаны қандай жақсы. Біріншіден, бұл климатты қорғау үшін жақсы дүние. Екіншіден, жаяу жүргіншілер әдетте көліктер жүретін жолмен еркін жүре алады. Осы акция арқылы біз, біздің көшенің автокөліктерден бос бола алатынын көрсеттік, – дейді Жезқазған электрмен жабдықтау дистанциясы бастығының орынбасары М.Нұрмағанбетов.
Автокөліксіз күн – бұл көліксіз жүруге болатынын меңзейтін маңызды белгі. Ең бастысы ортасын табу керек. Әрине, көліктен түбегейлі бас тартып, үнемі велосипедпен жүру мүмкін емес. Алайда, көліксіз өткен бұл күн расымен көп теміржолшыға неліктен арасында велосипедпен жүрмеске деген ой салыпты.
«Бір жағынан денсаулыққа пайдалы, екінші жағынан үнемді, үшіншіден, қоршаған ортаға зияны жоқ» деп пікірлерін білдіреді жұмысқа шайтан арбамен келген Шымкент НЖС-тің жетекші инженері С.Сафаров пен Шу белгі беру және байланыс дистанциясының қызметкерлері.
Ал Ақтөбе электрмен жабдықтау дистанциясының еңбеккері Ержан Комиссариев жеке көлік, қолайлы қоғамдық көлік, тіпті велосипед пен жаяу жүруге балама әдіс ретінде жылқыны пайдаланып, жұмысқа атпен келіпті.