ҚТЖ кадр саясаты: 2023-2028 жылдарға арналған конкурстық іріктеу рәсіміне қандай өзгерістер енгізілді?
"Қазақстан теміржолшысы" газетінің Жамбыл облысындағы меншікті тілшісі
Кез келген саланың дамуы кадр саясатына тікелей байланысты. Білікті мамандарды іріктеп алу – істі ілгері басқызатыны түсінікті. «Қазақстан темір жолы» ҰК» АҚ-ның алдағы 5 жылға конкурстық іріктеу рәсіміне енгізген өзгерістері осындай мақсаттан туындаған.
«ҚТЖ» ҰК» АҚ-ның кадр саясаты: 2023-2028 жылдарға арналған конкурстық іріктеу рәсіміне қандай өзгерістер енгізілді? Ұжымдық шартта қандай талаптар ескерілуі тиіс? «ҚТЖ» ҰК» АҚ филиалы – Жамбыл магистральдық желі бөлімшесінің персоналды басқару бөлімі ұйымдастырған практикалық семинарда кадр саясатына қатысты кеңес беріліп, түйткілді мәселелер талқыланды.
«ҚТЖ» ҰК «АҚ-ның кадр саясаты: 2023-2028 жылдарға арналған конкурстық іріктеу рәсіміндегі өзгерістер. 2024-2026 жылдарға арналған «Қазақстан темір жолы» ұлттық компаниясы» АҚ және оның еңбек ұжымы арасындағы «Ұжымдық шарт» және қызметкерлерге еңбекақы төлеу мен сыйақы беру қағидалары» тақырыбын көтерген семинарға Жамбыл магистральдық желі бөлімшесіне қарасты барлық мекеменің кадр жөніндегі менеджерлері қатысты. Атап айтсақ, Шу, Жамбыл, Сарышаған жол және электрмен жабдықтау дистанциялары, белгі беру және байланыс дистанциясының, Луговой рельс дәнекерлеу кәсіпорнының кадрлық мәселелерге жауапты мамандарына кадр саясатына байланысты жаңадан енгізілген өзгерістер мен талаптар түсіндіріліп, жаңадан қабылданған Ұжымдық шартқа байланысты сауалдарға жауап берілді.
– Екі күнге созылған практикалық семинарда Ұжымдық шартқа байланысты туындаған сұрақ көп болды.Тміржолшыларға еңбекақы төлеу және сыйақы беру қағидалары жан-жақты түсіндірілді. Кадр жөніндегі мамандар жұмыс барысындағы ситуациялық жағдайлардың оң шешімін табу үшін қандай ереже, қағидаларға сүйену керектігі төңірегінде пікір алмасты. Қажетті кеңестер берілді, – дейді «ҚТЖ» ҰК» АҚ филиалы Жамбыл магистральдық желі бөлімшесі персоналды басқару бөлімінің басшысы Назгүл Кекежанова.
Семинар қортыныдысы бойынша барлық қатысушыға арнайы сертификаттар табыс етілді.
