Санитарлық талаптар сақталуы тиіс
«Қазақстан теміржолшысы» газетінің тілшісі
Көліктегі санитарлық-эпидемиологиялық бақылау департаменті жолаушылар вагондарының күтіп-ұстауға және пайдалануға қойылатын санитарлық-эпидемиологиялық талаптар туралы хабарлады.
Аталған департамент өкілдерінің айтуынша, талаптарға сай келмейтін вагондарды пайдалануға болмайды. Мысалы, суық және ыстық сумен жабдықтау жүйесі, жылу, желдету, электр жарығы, санитарлық-техникалық жабдықтар, тоңазытқыштар, дәретханалардағы су ағызу тетігінде ақаудың болуы, іші лас, әйнектері сынған немесе жоқ болуы, жылдың салқын және ауыспалы кезеңінде терезе жақтауларының бекітілмеуі, есіктерінің ақаулы болуы, сонымен қатар вагонда жәндіктер мен кеміргіштер болса, жабдықтармен, төсек-орын керек-жарақтарымен жеткіліксіз түрде жабдықталмаған жағдайда талап бұзылады.
– Пойыздарда вагондардың тазалығын сақтау – міндет, купелер мен дәліздерді дымқыл шүберекпен тәулігіне кемінде екі рет, ал дәретханаларды кемінде төрт рет тазалап тұру керек. Барлық тасымалдаушылар мен жолаушыларды белгіленген санитарлық ережелер мен гигиеналық нормаларды сақтауға шақырамыз. Егер жолаушы талаптардың бұзылуына куә болса, көліктегі санитарлық-эпидемиологиялық бақылау департаментіне тиісті өтінішпен жүгіне алады, – дейді Көліктегі санитарлық-эпидемиологиялық бақылау департаментінің басшысы Жанар Оразалина.