Сала еңбеккерлері марапатталды
«Қазақстан теміржолшысы» газетінің тілшісі
Республика күні қарсаңында теміржолшылар көлік саласы мен елдің дамуына қосқан елеулі үлестері үшін мемлекеттік және партиялық наградалармен марапатталды.
Салтанатты жиында «Самұрық-Қазына» АҚ басшысы Нұрлан Жақыпов «Kazlogistics» ЗТБ бас директоры Қанат Әлмағамбетовке «Парасат» орденін табыс етті. «ҚТЖ» ҰК» АҚ Аппарат басшысы Серік Кеулімжаев пен Семей магистральдық желі бөлімшесінің жол бригадирі Николай Санков «Құрмет» орденінің иегерлері атанды.
«Ерен еңбегі үшін» медальдары Қарағанды магистральдық желі бөлімшесінің жол шебері Болат Бекеновке, Павлодар жүк тасымалы бөлімшесі Павлодар технологиялық орталығының бастығы Бақыт Жансақбаеваға табысталды. Ал «Белсенді қызметі үшін» партиялық наградасымен Павлодар магистральдық желі бөлімшесі директорының орынбасары Қанат Сатабаев марапатталды.
«ҚТЖ» ұлттық компаниясында да марапат жауған күн болды. Компанияның аппарат жетекшісі Серік Кеулімжаев «Қазақстан темір жолына – 120 жыл» мерекелік медалімен саланың өсіп-өркендеуіне, дамуына сүбелі үлес қосқан теміржол саласының әртүрлі қызметтерінде тер төгіп жүрген мамандарды марапаттады. Олардың қатарында БАҚ-пен жұмыс департаментінің бас менеджерлері Любовь Подоляк пен Зарина Добенова бар.