Өткелдерге бейнебақылау жүйесі орнатылады
«Қазақстан теміржолшысы» газетінің тілшісі
2025 жылдан бастап теміржолдың күзетілетін және күзетілмейтін өткелдеріне кезең-кезеңмен бейнебақылау жүйесі орнатылатын болады.
Ол деректерді автоматты түрде тіркейді. Сала мамандарының айтуынша, өткелдерде жол-көлік оқиғаларының орын алуына басты себеп – автокөлік жүргізушілері тәртібінің төмендігі, яғни темір жолдан өту ережесін өрескел бұзуы болып отыр. Тіпті өткелдің сигнал беру құрылғысы дұрыс жұмыс істеп, тыйым салған белгісі тұрған кезде де жүргізушілер жолды кесіп өтуге әрекет етеді екен. Осындай жауапсыздық пен ереже бұзушылық салдарынан биылғы жылдың 9 айында 19 жол-көлік оқиғасы болған.
Қауіпті жағдайлардың алдын алу мақсатында теміржолшылар құқыққорғау органдарымен бірлесіп жылдың басынан бері 1480 рейд өткізіп, оның барысында 281 бұзушылық анықтаған. Сондай-ақ 85 мыңнан астам көлік жүргізушісіне өткелден өту ережелері түсіндірілген.