Үздік дефектоскоп маманы анықталды
«Қазақстан теміржолшысы» газетінің тілшісі
Жұмысшы мамандықтары жылы аясында Астанада өткен «Қазақстан Республикасының үздік дефектоскописі» байқауына қатысуға еліміздің түкпір-түкпірінен сапаны бақылау саласына қызмет көрсететін 300 маман тілек білдірді.
Алайда екінші турға олардың арасынан іріктеліп шыққан 64 маман ғана өтті. Байқау екі кезеңнен тұрды. Бірінші кезеңде теориялық, яғни стандарттар мен әдістемелерге қатысты білім тексерілсе, екінші кезеңде жабдықтарды пайдалана отырып, міндеттерді орындауға қатысты практикалық біліктілікке көңіл бөлінді.
Екі күндік жарыста қатысушылар технологиялық жабдықтармен жұмыс істеу шеберлігін паш етіп, қысқа уақыт ішінде күрделі тапсырмаларды сапалы орындауға тырысты. Мамандықтың маңыздылығы мен сапа стандарттарын арттыруға арналған байқау дефектоскопистер үшін ең алдымен тәжірибе алмасу алаңы болды.
Теміржол саласынан байқауға қатысқан «Қамқор Вагон» ЖШС мамандары жоғары деңгейдегі шеберлік, терең білім, әртүрлі салалардағы қауіпсіздік пен сенімділікті дамытуға қосқан үлестерін көрсете білді. Олардың қатарында Алматы-1 станциясы ВДШ дефектоскопистері Жандос Дюсебаев, Айдар Аққасқанов, Ерхат Закиров, сонымен қатар Қазалы вагон жөндеу депосынан Қанат Қайратов, Павлодар ВЖД-дан Айсұлу Балташева және Шалқар ВЖД-дан Роман Кәрібаев сынды серіктестіктің бетке ұстар үздіктері компания намысын қорғады.
Байқауға қатысушыларға 100 000 теңге көлемінде жыл соңына дейін жарамды білім жетілдіру сертификаттары мен естелік сыйлықтар табыс етілді. Ал «Қамқор Вагон» ЖШС басшылығы мен кәсіподағы қатысушыларын біржолғы ақшалай сыйақымен бірге алғыс хатпен марапаттады.