Қазақстан мен Қытай бірлесіп Транскаспий халықаралық көлік бағыты бойынша тасымалдау көлемін ұлғайтады
Көлік саласындағы ынтымақтастық жөніндегі комитеттің кезекті 15-ші отырысы аясында ҚР Көлік вице-министрі Мақсат Қалиақпаров ҚХР Көлік министрінің орынбасары Ли Янмен Үрімжі қаласында екіжақты келіссөздер жүргізді, деп хабарлайды Rail-news.kz.
Комитет отырысы барысында тараптар Транскаспий халықаралық көлік бағытын одан әрі дамыту және осы бағыт бойынша тасымалдау көлемін арттыру туралы келісімге келді.
Қытай Қазақстан арқылы Еуропаға TХКБ бойынша автомобиль көлігімен жүк тасымалдау көлемін ұлғайтуға мүдделілік танытты. Өткен жылы екі ел арасында жүк тасымалдауға мүмкіндік беретін шетелдік рұқсат бланкілерін беру электронды форматқа ауыстырылды. Бұл тасымалдау көлемін екі есе арттыруға мүмкіндік берді.
Сондай-ақ, тараптар жолаушылар ағынын ұлғайту, сондай-ақ ұшулар географиясын кеңейту аясында өзара мүдделілік танытты. Мысалы, көктемгі және жазғы навигация кезінде екі ел арасында аптасына 124 әуе рейсі орындалмақ. Сондай-ақ жүк рейстерін межелі пункттер мен жиіліктер бойынша шектеусіз орындау туралы келісімге қол жеткізілді.
Көлік ынтымақтастығын арттыру аясында Қазақстан тарапы Қытай-Орталық Азия көлік министрлерінің 2-ші кездесуін ұйымдастыруды ұсынды.
Комитет отырысының қорытындысы бойынша тараптар тиісті Хаттамаға қол қойды.