Әлемнің мәні – әйелде
«Қазақстан теміржолшысы» газетінің тілшісі
Халықаралық әйелдер күні мерекесі қарсаңында «ҚТЖ» ҰК» АҚ Басқарма төрағасы Нұрлан Сауранбаев ұлттық компанияда тер төгіп жүрген нәзік жан иелерін өткен жылы енгізілген жаңа салалық наградалармен марапаттады.
Өткен жылы жаңа наградалардың 23 түрі енгізілді. Ал бүгін осы марапаттардың алғашқы иегерлері болып отырған 29 әйел – теміржолдың түрлі саласында табысты еңбек етіп, жетістікке жетіп жүрген жандар.
«Темір жолда жұмыс істеу оңай шаруа емес, алайда компанияның әйел қызметкерлері ауа-райы мен тәуліктің кез келген уақытына қарамастан ер адамдармен иық тіресе еңбек етіп, тасымалдың тоқтаусыз процесі мен қауіпсіздігін қамтамасыз етіп келеді. Қазіргі уақытта теміржол көлігінің әртүрлі салаларында – локомотив, жол, вагон шаруашылықтарында, қозғалысы қызметінде, жолаушылар кешенінің кәсіпорындарында 26 мыңнан астам әйел жұмыс істейді, 2,5 мыңға жуық әйел басшылық қызметтерді атқарады. Сіздердің тапқырлық, абстрактілі ойлау қабілеттеріңіз шешім қабылдау сапасын арттыруға, проблемалық жағдайлар мен сын-қатерлерді тиімді шешуге мүмкіндік береді. Қиындығымен қатар өте маңызды жұмыста сіздерге денсаулық, бақыт, көктемдей көтеріңкі көңіл-күй, құт-береке, отбасы амандығын тілеймін», – деп құттықтау лебізін білдірді Нұрлан Сауранбаев.
Марапаттау рәсімінен кейін награда иелері Компания басшысымен суретке түсіп, компания қызметкерлерінің өз күшімен ұйымдастырылған мерекелік концертті тамашалады. Фойеде нәзік жанды ханымдарға арналып, арнайы безендірілген фотоалаңда теміржолшы әйелдер естелік суреттерге түсті.