ҚТЖ және Цзиньхуа Көлік-инвестициялық тобы логистикалық кешен салу туралы келісті
"ҚТЖ" ҰК" АҚ-да компания басшылығы мен Цзиньхуа қаласы ҚКП Партком хатшысы Чжу Чунле мырзаның басшылығымен Қытайдан келген делегацияның кездесуі өтті, деп хабарлайды Rail-news.kz.
Кездесу барысында тараптар транзиттік мүмкіндіктерді кеңейтуге және мультимодальды тасымалдардың тиімділігін арттыруға бағытталған ынтымақтастықтың жаңа бағыттарын талқылады. Сондай-ақ, ТХКБ маршруты бойындағы тиімді логистикалық инфрақұрылымды қалыптастыру мәселелері талқыланды.
Келіссөздер қорытындысы бойынша ҚТЖ-ның еншілес ұйымы ("Кедентранссервис" АҚ) және Цзиньхуа ірі көліктік-инвестициялық тобы ниет туралы меморандумға қол қойды. Құжат Алматы қаласында көлік-логистикалық кешен салу жөніндегі жобаны іске асыруға бағытталған.
Логистикалық кешен процестерді оңтайландыруға, халықаралық көлік маршруттарын біріктіруге және Қазақстан мен Қытайдың ірі логистикалық хабтарының бірыңғай көлік негізін құруға мүмкіндік береді. Бұл мультипликативті әсер етіп, екі елдің сауда-экономикалық байланыстарын жандандыруға жаңа мүмкіндіктер ашады.
Жобада экспорттық-импорттық хаб режимінде жүктерді шоғырландыруға мүмкіндік беретін контейнерлік алаң мен заманауи қойма үй-жайларын салу көзделген (жалпы ауданы 17,9 гектар, жобалық қуаты жылына 300 мың ЖФЭ).