Душанбеде ТМД елдері теміржол көлігі кеңесінің 82-ші отырысы өтті
Тәжікстан Республикасының Душанбе қаласында Тәуелсіз Мемлекеттер Достастығына мүше мемлекеттердің Теміржол көлігі кеңесінің 82-ші отырысы өтті, деп хабарлайды Rail-news.kz.
Жиынға Әзербайжан, Армения, Беларусь, Қазақстан, Қырғызстан, Ресей, Тәжікстан, Түрікменстан және Өзбекстан теміржол әкімшіліктерінің басшылары, сондай-ақ Грузия, Иран, Латвия және Эстония әкімшіліктерінің өкілдері қатысты.
Қазақстан атынан «Қазақстан темір жолы» Ұлттық компаниясы» АҚ басқарма төрағасының орынбасары Талғат Алдыбергенов қатысып, баяндама жасады.
Отырыс барысында 2025 жылдың алғашқы тоқсанындағы теміржол саласының жұмысы қорытындыланды. ТМД елдерінің теміржол желісі бойынша 387,2 млн тонна жүк тасымалданған. Жүк айналымы 2024 жылдың сәйкес кезеңімен салыстырғанда 1,6 %-ға артты.
Контейнерлік тасымалдар жоспадан 8,3 %-ға, ал өткен жылдың алғашқы тоқсанымен салыстырғанда 5,6 %-ға артық орындалған. Жүк вагондарының орташа тәуліктік жұмыс паркі – 1,4 млн бірлікті құрады.
Халықаралық жолаушылар тасымалында да оң динамика байқалды: жолаушылар айналымы 17 %-ға өсіп, тасымалданған жолаушылар саны 2,3 млн адамға жетті. Бұл – өткен жылдың сәйкес көрсеткішінен 16 %-ға көп.
Кеңестің келесі, 83-ші отырысы 2025 жылғы қарашада Әзербайжан Республикасының Баку қаласында өтеді.