Теміржол және су көлігі комитетінің төрағасы Атыраудағы вагон шығару зауытына барды
Қазақстан Республикасы Көлік министрлігі Теміржол және су көлігі комитетінің төрағасы Тайжанов Жәнібек Жұмаұлы жұмыс сапары аясында Texol Group компаниясына қарасты Атырауда орналасқан вагон шығаратын зауытына барып, өндіріс барысымен танысты, деп хабарлайды Rail-news.kz Көлік министрлігіне сілтеме жасап.
Texol зауыты — Қазақстандағы ірі жеке вагон құрастыру жобаларының бірі. Кәсіпорынның өндірістік қуаттылығы 2027 жылға қарай жылына 8 000 жүк вагонын құрайды. Қазіргі уақытта зауытта жартылай вагондар, платформалар және цистерналар заманауи технологиялар мен сапа стандарттарына сәйкес құрастырылуда.
Сапар барысында Жәнібек Жұмаұлы дәнекерлеу, сырлау, құрастыру және соңғы бақылау кезеңдерін қамтитын негізгі өндірістік циклдармен танысты. Сонымен қатар, өндірістік қуаттылықты кеңейтуге мүмкіндік беретін жаңа құйма компоненттерін шығаратын цех құру жоспарлары таныстырылды.
«Атырауда мұндай ауқымды өндірістік жобаның іске қосылуы — көлік саласы үшін стратегиялық маңызға ие. Texol компаниясы отандық вагон құрастыру саласын дамытуда жүйелі тәсілді көрсетіп отыр», — деді Жәнібек Тайжанов.
Комитет төрағасы жобаның қарқынын жоғары бағалап, аймақтардағы өндірістік инфрақұрылымды дамыту маңызды екенін атап өтті.