ҚТЖ бөгде адамдардың темір жолға шығуының алдын алуда
ҚТЖ теміржол инфрақұрылымы объектілерінде жазатайым оқиғалардың алдын алу бойынша жүйелі жұмысты жалғастыруда, деп хабарлайды Rail-news.kz.
2025 жылдың бірінші жартыжылдығында темір жолға жақын орналасқан елді мекендер тұрғындарымен 1664 түсіндіру кездесулері өткізілді. Іс-шараларға 16,7 мыңнан астам адам қатысты. Оқу орындарында 27 мыңнан астам оқушыны қамти отырып, “Темір жолы — қауіптілігі жоғары аймақ” тақырыбы бойынша 950 кездесу ұйымдастырылды.
Бөгде адамдардың жолға шығуының алдын алу шеңберінде көлік прокуратурасы, полиция, бақылаушы органдар мен бейінді қызметтер өкілдерінің қатысуымен үйлестіру кеңестерінің 98 отырысы өтті.
ЖІІБ, ӘТЖК және МЖБ-мен бірлесіп, рұқсатсыз өту орындарында 1 557 рейд жүргізілді. Құқық бұзушылармен түсіндірме әңгімелер жүргізілді. 526 ескерту белгісі орнатылды және жаңартылды.
Локомотив бригадалары уақтылы шаралар қабылдау үшін жолдарға жақын бөгде адамдар мен мал туралы ақпаратты қарсы келе жатқан пойыздарға, пойыздық диспетчерлерге және станциялар бойынша кезекшілерге жедел жіберіп отырады.