ҚТЖ және Dynamic Aviation жүк авиациясы саласындағы ынтымақтастықтың перспективаларын талқылады
Астанада "Қазақстан темір жолы» ҰК" АҚ мен бұған дейін ҚР Президенті Қасым-Жомарт ТоқаевтыңНью-Йоркке (АҚШ) жасаған сапары аясында Мемлекет басшысының қатысуымен өткен дөңгелек үстелде болған америкалық Dynamic Aviation компаниясының басшылығының кездесуі өтті, деп хабарлайды Rail-news.kz.
Тараптар ҚТЖ жүргізіп жатқан ұлттық жүк авиатасымалдаушыны құру жөніндегі жұмыс шеңберінде жүк авиатасымалдарын дамытудағы ынтымақтастық мүмкіндіктерін талқылады.
Dynamic Aviation нарықта 1997 жылдан бері жұмыс істейді және бүгінде АҚШ-тағы ең ірі мамандандырылған авиация операторларының бірі болып табылады. Компания тапсырыс берушінің міндеттері үшін ұшақтарды пайдалануға, техникалық қызмет көрсетуге және өзгертуге маманданған. Dynamic Aviation-ның басты артықшылығы мамандандырылған шешімдерді жүзеге асырудағы бірегей сараптамасы болып табылады.
Dynamic Aviation тәжірибесі Қазақстанның ұлттық жүк авиатасымалдаушысы сервисінің сенімділігі мен жоғары сапасын қамтамасыз ету мақсатында операциялық модельді қалыптастыру және техникалық қызмет көрсетудің заманауи стандарттарын енгізу кезінде пайдаланылуы мүмкін.
Қатысушылар елдің транзиттік әлеуетін нығайтудың және оның Жібек жолындағы негізгі буын ретіндегі рөлін арттырудың қосымша факторы болып табылатын Қазақстанның көлік жүйесіндегі авиациялық құрамдас бөлігін дамытудың стратегиялық маңыздылығын атап өтті.