Теміржолшылар «Таза Қазақстан» акциясы аясында 500-ден астам ағаш отырғызды
«Қазақстан теміржолшысы» газетінің тілшісі
Республикалық «Tаза Қазақстан» экологиялық акциясы аясында «ҚТЖ» ҰК» АҚ «Магистральдық желі дирекциясы» филиалының қызметкерлері сенбілік өткізіп, Астана – №96 разъезд аралығына 509 түп ағаш көшетін отырғызды.
Іс-шараға дирекцияның орталық аппараты мен құрылымдық мекемелерінің қызметкерлері мен олардың балалары да қатысты. Ұжымның ауызбіршілігі мен экологиялық құндылықтарға бейілділігін танытқан акция аясында ауқымды жұмыс атқарылды.
– Ақмола магистральдық жол бөлімшесі бойынша барлығы 10 723 көшет сатып алынды, 28 құрылымдық мекеменің теміржолшылары жұмылдырылды, барлығы 5253 адам қатысты. Алдын ала белгіленген орындарға ағаштар егілді. Бұл акцияның маңызы экологиялық мәселелер бойынша өте өзекті. Алдағы уақытта да біздің бөлімше қызметкерлері «Таза Қазақстан» акциясын қолдап, қоршаған ортаға деген қамқорлығын көрсетуге дайын, – дейді Ақмола магистральдық желі бөлімшесі директорының орынбасары Рашид Есенбекұлы.
Акция аумақтарды көгалдандыруға, экологиялық жағдайды жақсартуға және табиғатқа ұқыпты қарау мәдениетін қалыптастыруға бағытталған.
– ПЧ-17 құрамына кіретін 15 станцияда, табельдік және модульдік ғимараттардың, Астана бойынша әкімшілік ғимарат ауласында жүргізілді. Дистанциядан барлығы 500 теміржолшы қатысты. Бұл акцияның бірінші кезекте әрине экологиялық маңызы бар, елорданың өсуіне байланысты көліктің және зауыттардың, жылу беретін ЖЭО-ның көбеюі де байқалуда. Соған байланысты тал-дарақ, ағаштарды көбейту ауаның тазаруына үлкен көмек болмақ, – дейді Астана жол дистанциясының бас инженері Төленді Шапшекеев.
Филиал директоры Сәкен Рахметов «ҚТЖ» ҰК» АҚ басқарма төрағасы Талғат Алдыбергеновтен экологиялық челленджді қабылдап, сенбілік аяқталған соң оны келесі бөлімше – Қостанай магистральдық желі бөлімшесіне жолдады. Осылайша «Таза Қазақстан» акциясы филиалдың барлық бөлімшелерінде жалғасады.