Алты станцияда дауыстап хабарлау жүйесі енгізілді
ҚТЖ инфрақұрылымды жаңғырту және теміржол көлігіндегі қауіпсіздік деңгейін арттыру бойынша жүйелі жұмысты жалғастыруда, деп хабарлайды Rail-news.kz.
Алты станцияда көліктік қауіпсіздіктің негізгі элементтерінің бірі — дауыстап хабарлау паркі жүйесі енгізілді. Жобаны ұйымдастырушы – «ҚТЖ» ҰК» АҚ – «Магистральдық желі дирекциясы»филиалының Автоматика, телемеханика және телекоммуникация департаменті.
Жүйе қызметкерлер мен жолаушыларды уақтылы хабардар етуді, кезекшілер, машинистер мен бригадалар арасындағы іс-қимылдарды үйлестіруді, авариялық жағдайлар мен технологиялық тәуекелдердің алдын алуды және станцияларда сервис деңгейін арттыруды қамтамасыз етеді.
Жобаны іске асыру әсіресе пойыздар қозғалысы қарқындылығының өсуі мен саланы жаңғырту жағдайында өзекті.
Бұдан басқа, департамент нормативтік қызмет мерзімі өтіп кеткен электр орталықтандыру құрылғыларының (ЭО) қуаттау панельдерін ауыстыру жөніндегі бағдарламаны іске асырады. 2025 жылы ауыстыру он станцияда жүргізілді. Жаңартуға жататын 55 панельдің ішінде сенімділік пен энергия тиімділігінің заманауи талаптарына жауап беретін 35 жаңа панель орнатылды.
Жаңа панельдер тұрақты электр қуатын қамтамасыз етеді және ақаулықтарды тез анықтауға мүмкіндік беретін қорғаныс пен диагностикалық жүйемен жабдықталған.
2027 жылдың соңына дейін қалған станцияларда панельдерді орнатуды аяқтау жоспарлануда, бұл ЭО құрылғыларының электрмен жабдықтау жүйесін толығымен жаңартуға және белгі беру, орталықтандыру және бұғаттау жүйелерінің сенімділігі мен жұмыс істеу қауіпсіздігін арттыруға мүмкіндік береді.