Бейнеттен зейнетке бастар жол...
«Қазақстан теміржолшысы» газетінің тілшісі
Өткен аптаның соңғы жұмыс күні «ҚТЖ» ҰК» АҚ филиалы – «Көпфункционалды қызмет көрсету орталығының» ұжымы темір жолда 40 жылдан астам уақыт еңбек еткен Алмагүл Оңғарованы зейнет демалысына шығарып салды.
– Бүгін біз бір жағынан қуаныш, бір жағынан сағынышпен әріптесіміз Алмагүл Тасболатқызын зейнетке шығарып салып жатырмыз. Сіз кәсіби біліктілігіңіздің арқасында жүктелген міндеттердің абырой биігінен көрініп, компания үшін аянбай еңбек еттіңіз. Енді көпжылғы еңбегіңіздің зейнетін көргелі отырсыз. Сізге мықты денсаулық, отбасы амандығын, немерелердің қызығын көруді тілейміз, – деп ізгі тілегін білдірді Орталық директоры Бақытжан Қаңлыбаев.
Алмагүл Оңғарова алғаш еңбек жолын 1982 жылы сол кездегі Батыс Қазақстан темір жолына қарасты Қазалы станциясындағы 4-ші жол дистанциясында жол өлшегіш операторы болып бастады. 2000 жылдан бастап «ҚТЖ» ҰК» АҚ Инфрақұрылым департаментінің бухгалтерлік есеп бөлімінің бас маманы болып жұмыс істеді.
2011 жылы «ҚТЖ» ҰК» АҚ – «Магистральдық желі дирекциясы» филиалы Бухгалтерлік есеп департаментіне қарасты Бухгалтерлік есептілік құрастыру жөніндегі басқарманың салық есебі бөлімін басқарса, «ҚТЖ» ҰК» АҚ филиалы – «Көпфункционалды қызмет көрсету орталығы» құрылғаннан кейін 2016 жылдың желтоқсан айынан бастап Салық есептілігі департаментінің бас менеджері болып тағайындалады. Бұл департаментте ол бүгінгі күнге дейін «ҚТЖ» ҰК» АҚ бойынша корпоративтік табыс салығы жөніндегі декларацияны құруға жауапты болды. Әріптестері бұл міндеттің аса күрделі әрі жауапты шаруа екенін, бірақ әріптестері Алмагүлдің оны мінсіз орындап, кәсібиліктің жарқын үлгісін көрсете білгенін атап өтті.
Салтанатты жиында кейіпкерімізге көптеген алғыс хаттар мен бағалы сыйлықтар, гүл шоқтары табыс етілді. Олардың арасында «ҚТЖ» ҰК» АҚ Аппарат басшысының құттықтау хаты да бар.