Қазақстан мен Ресей көлік саласындағы әріптестікті дамыту жөнінде келісімдерге қол қойды
Қазақстан Республикасының Президенті Қасым-Жомарт Тоқаевтың Ресей Федерациясына мемлекеттік сапары аясында көлік және логистика саласындағы стратегиялық әріптестікті нығайтуға бағытталған бірнеше екіжақты құжатқа қол қойылды, деп хабарлайды Rail-news.kzАқордаға сілтеме жасап.
Қазақстан атынан құжаттарға көлік министрі Нұрлан Сауранбаев қол қойды.
Сапар барысында Қазақстан Республикасы Үкіметі мен Ресей Федерациясы Үкіметі арасында көлік қауіпсіздігін қамтамасыз ету саласындағы ынтымақтастық туралы келісім жасалды. Бұл құжат көлік қауіпсіздігін қамтамасыз ету бағытындағы өзара іс-қимылды дамытуға арналған. Екі тарап заңсыз араласу әрекеттерінің алдын алу, жедел ақпарат алмасу және қауіп туындаған жағдайда уәкілетті органдардың іс-қимылын үйлестіру бағытында бірлесе жұмыс істейтін болады.
Сонымен қатар, тараптар Ресей Федерациясы Үкіметі мен Қазақстан Республикасы Үкіметі арасындағы үшінші елдерге экспортталатын жүктердің транзиттік теміржол тасымалы мен тиеу-түсіру жұмыстарындағы ынтымақтастықты ұйымдастыру туралы келісімге қол қойды. Бұл келісім екі елдің транзиттік әлеуетін арттырып, логистикалық тізбектерді оңтайландыруға және халықаралық жүк тасымалының тиімділігін көтеруге мүмкіндік береді.
Бұдан бөлек, шекара маңындағы инфрақұрылымды жаңғырту мақсатында ресей-қазақ мемлекеттік шекарасындағы автокөлік өткізу бекеттерін дамыту жөніндегі іс-шаралар жоспары («Жол картасы») бекітілді. Оның жүзеге асуы өткізу бекеттерінің өткізу қабілетін арттырып, шекарадан өту уақытын қысқартуға және сыртқы экономикалық қызметке қатысушылар үшін қолайлы жағдай жасауға жол ашады.
Қол қойылған келісімдер Қазақстан мен Ресей арасындағы көлік саласындағы стратегиялық серіктестікті тереңдетуге бағытталған және олардың жүзеге асуы Еуразия кеңістігіндегі тұрақты логистикалық бағыттарды қалыптастыруға, транзиттік дәліздерді дамытуға әрі екі елдің көлік торап ретіндегі рөлін күшейтуге ықпал етпек.