ҚТЖ мен Эстония ынтымақтастықты дамыту мен Орта дәліздің перспективаларын талқылады
ҚТЖ-да Инфрақұрылым министрі Кулдар Лейс бастаған Эстония Республикасының делегациясымен кездесу өтті. Теміржол тасымалы саласындағы ағымдағы өзара іс-қимыл және Транскаспий халықаралық көлік бағдарын (Орта дәліз) дамыту мәселесі талқыланды, деп хабарлайды Rail-news.kz.
Осы жылдың 10 айында Қазақстан мен Эстония арасындағы теміржол көлігімен жүк тасымалдау көлемі 264,1 мың тоннаны құрады, бұл 2024 жылдың сәйкес кезеңімен салыстырғанда 61,4% жоғары.
Орта дәліз Қазақстан арқылы транзиттің стратегиялық маңызды бағдарына айналып жатқаны атап өтілді. Қытайдан Еуропаға жүктерді жеткізу уақыты 15-18 күнді құрайды, бұл теңіз жолынан екі есе жылдам.
ҚТЖ сервисінің сапасын арттыру үшін PSA International компаниясымен бірлесіп транзиттік декларациялаудың ашықтығын, Қазақстанның бүкіл аумағы бойынша жүктерді қадағалауды және бірыңғай цифрлық құжат айналымын қамтамасыз ететін мультимодальды тасымалдардың цифрлық дәлізі енгізілді. Қазақстан аумағында теміржол операторы, экспедитор және кеден органдары арасындағы цифрлық процестердің интеграциясы аяқталды, бұл жүктердің өтуін жеделдетуге мүмкіндік береді.
ҚТЖ тұрақты тарифтерді, жеткізудің оңтайландырылған мерзімдерін және клиентке бағдарланған сервисті ұсына отырып, клиенттер үшін маршруттың тартымдылығын арттыру бойынша жұмысты жалғастыруда.
Орта мерзімді перспективада компания Орта дәліз бойынша жүк ағынын 10 млн тоннаға дейін арттыруды жоспарлап отыр.