ҚХР-ға сапары аясында ҚТЖ халықаралық ынтымақтастықты нығайтуда
«Қазақстан темір жолы» ҰК» АҚ басшылығының делегациясы Қытайға жұмыс сапары аясында Сиань Құрғақ портын, Xianguojigang станциясын, сондай-ақ осы маңызды көлік торабындағы қазақстандық терминалды қоса алғанда, негізгі логистикалық нысандарды аралады. Дәл осы Сиань қаласы контейнерлік пойыздарды жөнелту бойынша көшбасшы болып саналады – жалпы көлемнің 46%, 16 мыңнан астам ЖФБ, деп хабарлайды Rail-news.kz.
ҚТЖ басшылығы операциялық қызметпен танысып, ынтымақтастықты кеңейту перспективаларын және жүк тасымалдау тиімділігін арттырудың жаңа тетіктерін талқылады.
Сонымен қатар, мұнда ҚТЖ Басқарма төрағасы Талғат Алдыбергенов Сиань қаласының мэрі Йе Нюпин мырзамен маңызды кездесу өткізді. Диалог барысында көліктік-логистикалық өзара іс-қимылды кеңейту, жүк тасымалдау көлемін ұлғайту және халықаралық маршруттар шеңберінде байланыстарды нығайту мәселелері талқыланды.
ҚТЖ, әзірбайжан мен грузин теміржолдары, сондай-ақ Сиань қаласының мэриясы арасындағы төрт жақты кездесу ерекше маңызға ие болды. Тараптар, оның ішінде түрік темір жолдарының өкілдері Транскаспий халықаралық көлік бағдарын (ТХКБ) дамытуға бейілділігін растады және инфрақұрылымды жақсарту, логистикалық процестерді цифрландыру және жүк ағындарын үйлестіру жөніндегі бірлескен қадамдарды келісті.
Сондай-ақ, «Қазақстан темір жолы» ҰК» АҚ басшылығы Түркіменстанның Теміржол көлігі министрі және Цзиньхуа қаласы Қытай Коммунистік партиясы парткомының хатшысы Чжу Чунле мырзамен кездесу өткізді. Тараптар «Бір белдеу – бір жол» бастамасы шеңберінде сауда-экономикалық ынтымақтастықты кеңейту, көліктік-логистикалық байланыстарды дамыту және транзиттік әлеуетті нығайту мәселелерін талқылады. Мультимодальды тасымалдау және логистикалық маршруттарды интеграциялау саласындағы бірлескен жобаларға ерекше назар аударылды.
Айта кетейік, Цзиньхуа қаласы Шығыс Қытайдың маңызды көлік және өнеркәсіптік орталығы болып табылады және оның басшылығымен диалогты дамыту Қытай мен Еуропа арасындағы негізгі транзиттік көпір ретінде ҚТЖ және жалпы Қазақстан үшін стратегиялық маңызға ие.
Тұтастай алғанда, Сиань мен Цзиньхуа еуразиялық көлік дәлізінде негізгі тораптың рөлін атқарады және ТХКБ-ны құрудың бастауында тұрған Қазақстан ҚР Президентінің елдің транзиттік әлеуетін ашу, «Қытай – Еуропа – Қытай» бағыты бойынша жүк ағынын арттыру және өңірлік ынтымақтастықты нығайту жөніндегі тапсырмаларын белсенді іске асыруды жалғастыруда.
Бұдан басқа, Қазақстан тасымалдау географиясын кеңейте отырып, жаңа логистикалық мүмкіндіктер ашып, бәсекеге қабілетті маршруттар ұсына отырып, Шығыс пен Батыс арасындағы сенімді транзиттік көпір мәртебесін нығайтуды жалғастыруда.
