25 жыл қызмет еткен қызметкерді ұжым ерекше құрметпен шығарып салды
«Қазақстан теміржолшысы» газетінің тілшісі
«ҚТЖ» ҰК» АҚ «Көпфункционалды қызмет көрсету орталығы» филиалы Қорларды басқару департаментінің директоры Гүлнар Аманбаева көп жылғы еңбегінің зейнетін көруге құрметті демалысқа шықты. Ұлттық компанияда ширек ғасырдан астам еңбек еткен маманды әріптестері үлкен қошемет-құрметпен шығарып салды.
Гүлнар Салыққызы – теміржол саласының қаржыгерлер қауымына кеңінен таныс тұлға. Еңбек жолын 1983 жылы еліміздегі жетекші жоғары оқу орындарының бірінде экономика кафедрасының оқытушысы болып бастаған ол аспирантураны бітіріп, банк саласында жауапты қызметтер атқарған. Темір жолдағы қызметі 1998 жылы басталып, ҚТЖ құрылып-қалыптасқан жылдары көп істің басы-қасында жүрді. Ұлттық компанияда экономикалық қызметті басқарып, көптеген ірі құрылымдық бөлімшелер, кәсіпорындар, филиалдардың қаржылық қызметін қалыптастыруда зор еңбек сіңірді.
Әріптестері оның жетекшілігімен компанияның операциялық қызметіне қыруар қаржыны үнемдеуге мүмкіндік берген үлкен-үлкен жобалар әзірленіп, енгізілгенін айтады. Бір ғана мысал, 2017-2018 жылдары Гүлнар Салыққызы «Сатып алуды санатты басқару» трансформациялық жобасына жетекшілік етіп, нәтижесінде осы жоба бойынша тікелей экономикалық тиімділік 27,2 млрд астам теңгені құрайды. Осындай тиімді жобалар білікті маманның еңбек қоржынында жеткілікті. 2022 жылы Гүлнар Аманбаева «Құрметті теміржолшы» белгісімен марапатталды.
– Гүлнар Салыққызы алдына қойған мақсаттарына қол жеткізуде табандылықтан таймайтын, өте білімді де іскер, өз ісіне берілген адал маман әрі әділетті басшы бола білді. Кез келген бастамада әр ұсынысты ой таразысына сала отырып, кәсіби шешім қабылдайтын жан, – дейді кейіпкерімізді зейнет жасымен құттықтауға келген әріптестері.
Қаржыгер маманның еңбектері еліміздің бірнеше ғылыми экономикалық журналдарында жарық көріп, мықты сарапшы ретінде тиімді ұсыныстары өндіріске енгізілген. Құшағы шоқ-шоқ гүл мен сый-сияпатқа толған Гүлнар Аманбаеваға әріптестері ең ізгі тілектерін арнап, басшылық көп жылғы адал еңбегі үшін алғыс айтты.