Ташкентте Транскаспий көлік дәлізі мен байланысты дамыту жөніндегі Инвесторлар форумы өтті
Ташкент қаласында Қазақстан Республикасы Көлік министрі Нұрлан Сауранбаев бастаған қазақстандық делегация Транскаспий көлік дәлізі мен байланысты дамыту жөніндегі Инвесторлар форумына қатысты, деп хабарлайды Rail-news.kz.
Іс-шара жоғары деңгейде ұйымдастырылды. Форум жұмысына Еуропалық одақтың комиссарлары, еуропалық қаржы институттарының өкілдері, сондай-ақ Орта дәліз бойында орналасқан елдердің көлік министрлері қатысты.
Форум аясында Орталық Азия, Еуропалық одақ, Оңтүстік Кавказ және Қара теңіз аймағы елдерінің көлік министрлерінің кездесуі өтті.
Қазақстан Республикасы Көлік министрі панельдік сессияда және министрлер кездесуінде баяндама жасап, ЕО-ның «GlobalGateway» бастамасы аясындағы ынтымақтастықтың оң динамикасын атап өтті. Сондай-ақ ТХКБ бойынша үкіметаралық келісім жобасын әзірлеу арқылы институционалдық базаны қабылдаудың маңыздылығы айтылды.
Форум қорытындысы бойынша қатысушылар Транскаспий көлік дәлізін дамыту шеңберінде аймақтар арасындағы серіктестікті кеңейтуге деген ортақ ұстанымды атап өтті.