Қазақстандағы тепловоз өндірісі: 2025 жылдың 11 айында 62 локомотив құрастырылды
Қазақстанның машина жасау саласындағы негізгі бағыттардың бірі – тепловоз шығару көрсеткіштері жарияланды. Ұлттық статистика бюросының мәліметінше, биылғы жылдың қаңтар-қараша айларында елімізде 62 дизельді локомотив өндірілген, деп хабарлайды Rail-news.kz.
Өткен жылмен салыстырғанда өндіріс көлемінде аздаған бәсеңдеу байқалады. Мәселен, 2024 жылдың дәл осы кезеңінде республика бойынша 78 бірлік техника шығарылған болатын. Дегенмен, сарапшылар бұл динамиканы нарықтағы сұраныс пен зауыттың жоспарлы қуаттылығына байланысты деп бағалап отыр.
Қазақстандағы дизельді локомотивтерді шығарумен айналысатын негізгі кәсіпорын – «Локомотив құрастыру зауыты». Қазіргі таңда бұл зауыт 100% америкалық Wabtec компаниясына тиесілі.
Кәсіпорын қазір «Қазақстан темір жолы» (ҚТЖ) үшін арнайы жасалған EvolutionsSeriesES44ACi (ТЭ33А) сериялы тепловоздарын құрастыру бойынша ауқымды тапсырысты орындап жатыр. Wabtec компаниясының бұған дейін таратқан баспасөз хабарламасына сәйкес, бұл сериялы локомотивтер теміржол тасымалының тиімділігін арттыруға бағытталған.
Зауыттың болашақ жоспарлары да айтарлықтай ауқымды. Мәлімделген ақпаратқа сәйкес, алдағы 10 жыл ішінде кәсіпорын базасында 300 бірлік ТЭ33АТ локомотивін құрастыру көзделіп отыр. Бұл жоба еліміздің транзиттік әлеуетін арттырып қана қоймай, теміржол паркін заманауи техникамен жаңартуға мүмкіндік береді.