Қасым-Жомарт Тоқаев: Қазақстан Еуразияның басты көлік хабына айналады

Мемлекет басшысы Қасым-Жомарт Тоқаев «Түркістан» газетіне берген сұхбатында еліміздің көлік-логистика саласын дамытудың стратегиялық жоспарларын жария етті. Президенттің айтуынша, Қазақстан өзінің географиялық артықшылығын пайдалана отырып, жаңғырудың жаңа кезеңіне қадам басты, деп хабарлайды Rail-news.kz.

Президент Қазақстанның теңізге шыға алмайтындығына қарамастан, Еуразия құрлығының дәл ортасында орналасуы үлкен мүмкіндік екенін атап өтті.

«Мақсат-мүддемізге сәйкес Қазақстанды Еуразияның көлік айлағы (хабы) ретінде қалыптастыру – бұл салада атқарылатын жұмыстың басты бағыты», - деді Қасым-Жомарт Тоқаев.

Сұхбат барысында Мемлекет басшысы нақты инфрақұрылымдық жобаларға тоқталды:

«Достық – Мойынты» магистралі: Бұл жоба Қытай мен Еуропа арасындағы жүк тасымалын 5 есе арттырады.

Жаңа желілер: Алдағы уақытта «Мойынты – Қызылжар», «Бақты – Аягөз» және «Дарбаза – Мақтаарал» теміржолдары іске қосылмақ.

Ауқымды жаңғырту: 2030 жылға дейін 5 мың шақырым теміржол салынып, 11 мың шақырым жол жөндеуден өтеді.

«Орталық – Батыс» күре жолы: Елорда мен батыс аймақтар арасын 500 шақырымға қысқартатын стратегиялық нысан болмақ.

Қазіргі таңда Қытай мен Еуропа арасындағы құрлық жолымен тасымалданатын жүктің 85 пайызы Қазақстан арқылы өтеді. Еліміз «Бір белдеу – бір жол», «Солтүстік – Оңтүстік» және Транскаспий халықаралық көлік бағытын («Орта дәліз») дамытуға ерекше мән беріп отыр.

Президент көлік саласының тек инфрақұрылым емес, геосаясаттың бір бөлігіне айналғанын атады.

«Көлік және логистика мәселесі геосаясаттың ажырамас бөлігіне айналды. Сондықтан, Қазақстан үшін де оның айрықша маңызы бар», - деді Тоқаев.

Үкіметтің алдына тек жол салу емес, заманауи сервистік инфрақұрылым мен цифрлық экожүйе қалыптастыру міндеті қойылды. Бұл экономиканың барлық секторына оң әсерін тигізбек.