Еңбегі еленген теміржолшы
«Қазақстан теміржолшысы» газетінің тілшісі
Әйелдер мерекесі қарсаңында «Жолаушылар тасымалы» АҚ ұжымы Сату және клиенттермен жұмыс департаментінің жоғарғы дәрежелі менеджері Орынтай Рахимованы зейнет демалысына шығарып салды.
Орынтай Сәбиденқызы – теміржолшы Қашановтар әулетінің үшінші ұрпағы. Атасы заманында теміржолшы әулетінің негізін қаласа, әкесі Сәбиден Қалубиденұлы Ұлы Отан соғысына қатысып, кейін Көлік милициясында отыз жылдан астам уақыт еңбек етіп, «Құрметті теміржолшы» атанған. Ал біздің кейіпкеріміз Орынтай – саналы ғұмырының қырық жылын темір жолға, оның ішінде жолаушылар тасымалына арнаған жан. Еңбек жолын 1986 жылы Тың теміржолында бастаған ол Целиноград станциясында билет кассирі, кейін «Солтүстік» филиалының теміржол вокзалдары билет кассирлерінің қаржылық қызметін тексеретін техник, тағысын тағы түрлі қызмет сатысынан өтіп, «Жолаушылар тасымалы» АҚ Сату және клиенттермен жұмыс департаментінің 16-шы дәрежелі менеджері лауазымына дейін көтерілді.
Орынтай Сәбиденқызының жолаушылар тасымалын дамытуға қосқан еңбегі ұшан-теңіз. Ол 2014 жылы «ҚТЖ» ҰК» АҚ-да электронды билет технологиясын енгізу жобасына қатысты, қазіргі уақытқа дейін бұл жоба электронды билеттерді сатуды басқаруға және жолсеріктің мобильді терминалы арқылы пойызға отырғызуды бақылауға арналып отыр.
Клиентке бағдарлануды дамыту және жолаушыларға ұсынылатын сервисті арттыру шеңберінде 2021 жылы «Әйелдер вагондары» жобасын енгізді және ұлттық тасымалдаушы бұл арнайы вагондарға билеттерді сатылымға шығарды. Осылайша, 2021 жылғы 10 қазаннан бастап әйел адамдарға арналған жол жүру құжаттарын ресімдеу бойынша жаңа қызмет іске қосылды.
Орынтай Рахимованың жолаушыларға көрсетілетін сервисті жақсарту, саланы дамытудағы ерен еңбектері «ҚТЖ» ҰК» АҚ басшылығы тарапынан әділ бағаланып, «Адал еңбегі үшін» медалімен, «Үздік маман» белгісімен, ал 2023 жылы Президенттің жарлығымен «Ерен еңбегі үшін» медалімен марапатталды.
Әріптестері Орынтай Сәбиденқызының атына жылы лебіздерін жаудырып, бағалы сыйлықтар мен десте-десте гүл шоқтарын тарту етіп, лайықты зейнет демалысына зор салтанатпен шығарып салды.