Теміржолшы аруларға тарту: ҚТЖ-да 8 наурыз мерекесі ерекше форматта өтті
Көктемнің алғашқы мерекесі - 8 наурыз Халықаралық әйелдер күні қарсаңында «Қазақстан темір жолы» ұлттық компаниясында жыл сайынғы әдетпен биыл да теміржол саласында еңбек етіп жүрген нәзік жандарға арналған мерекелік концерт ұйымдастырылды, деп хабарлайды Rail-news.kz.
Алайда биылғы салтанатты жиын мен концерттік бағдарламаның шоқтығы биік, форматы өзгеше болды. Мерекенің басты ерекшелігі сахна төрінде тек ер азаматтар өнер көрсетіп, әріптес аруларға ұмытылмас тосынсый жасады.
Теміржол саласы жауапкершілігі жоғары, тәртібі темірдей бекем сала. Мұндағы қауырт жұмыс пен ауыр графикке қарамастан, компанияның ер азаматтары өздерінің шығармашылық қырларын ашып, әріптестерін таңқалдыра білді. Концерттік бағдарламаға «ҚТЖ-Жүк тасымалы» ЖШС, «Жолаушылар тасымалы» АҚ, Магистральдық желілер дирекциясы, Көңілді тапқырлар клубы және «Қазтеміртранс» АҚ сияқты ірі еншілес ұйымдардың қызметкерлері белсене қатысты.
Сахнада тек лирикалық әндер ғана емес, аспаптық туындылар мен юморлық қойылымдар да орындалды. Ерлер қауымы теміржолдың дамуына үлес қосып жүрген әйелдердің еңбегін ерекше атап өтіп, алғыс білдірді. Күнделікті қатал ережелермен жұмыс істейтін теміржолшылардың сезімтал, өнерпаз қырын көру әйелдер қауымы үшін нағыз сыйлық болды.
Теміржолшы ерлер қауымының бұл тосынсыйына жиналған қауым дән риза болды. Жұмыс кестесінің тығыздығына қарамастан, олар арнайы дайындықтан өтіп, репетиция жасап, кәсіби деңгейдегі шоу ұсынды. Залда отырған нәзік жандардың жүзіндегі күлкі мен толассыз шапалақ ерлердің еңбегінің ең жоғары бағасы болды.
