«Жасыл желекті кеңсе» экологиялық акциясы басталды
«Қазақстан теміржолшысы» газетінің тілшісі
«ҚТЖ» ҰК» АҚ Әлеуметтік саясат департаментінің бастамасымен Астанадағы теміржолшылардың әкімшілік ғимаратында «Жасыл желекті кеңсе» экологиялық акциясы бастау алды.
Өткен сенбі, 4 сәуір күні басталған акцияға сала қызметкерлері бірауыздан қолдау білдіріп, сол күні бас офиске жиналғандар құмыраларға 1000 түп гүл көшетін отырғызды. Кеңсе қызметкерлері оларды күтіп, баптап көбейтіп, алдағы уақытта жұмыс орындарын жасыл желекке айналдырмақ ниетте.
– Өткен жылы Қазақстан темір жолы қызметкерлері «Таза Қазақстан» республикалық экологиялық бағдарламасын жүзеге асыру барысында еліміз бойынша 180 мыңнан астам ағаш отырғызды. Бұл елімізді жасыл желекке бөлеу арқылы экологиямызды жақсартуға, таза ауаның бөлінуіне қосқан үлесіміз. Биыл да біз бұл бағдарламаны жалғастыруды жөн көріп, «Жасыл желекті кеңсе» экологиялық акциясын бастадық. Бұл акцияның ерекшелігі - кеңсе қызметкерлерін өздері күні бойы жұмыс істейтін кеңселерінде, жұмыс орындарында бөлме гүлдерін өсіруге ынталандыру. Жасыл өсімдік ауаны тазарту арқылы адамның денсаулығына оң әсер етеді. Сонымен қатар жақсы көңілкүй, айналаңа әсемдік сыйлайды. Барлық теміржолшыларды жасыл желек акциясына қатысуға шақырамыз, – дейді Әлеуметтік саясат департаментінің өкілі Ержан Жаналиев.
Челлендж форматындағы акция Әлеуметтік саясат департаментінен басталып, «ҚТЖ» ҰК» АҚ – «Көпсалалы қызмет көрсету орталығы» филиалына беріліп, бір күннен соң «Әскерилендірілген темір жол күзеті» ЖШС ұжымына табысталды.