ҚТЖ және PNP Investment Management ынтымақтастықты дамыту мәселелерін талқылады
Астанада «Қазақстан темір жолы» ҰК» АҚ Басқарма Төрағасының Орынбасары Ерлан Қойшыбаевтың PNP Investment Management S.а.r.l инвестициялық компаниясы басшылығымен жұмыс кездесуі өтті, деп хабарлайды Rail-news.kz.
PNP Investment Management S. A.r. l. – Еуропа мен Еуразия өңірі елдерінде активтерді басқаруға, сондай-ақ инфрақұрылымдық және логистикалық жобаларды іске асыруға маманданған еуропалық инвестициялық компания. Көлік-логистика саласын компания ұзақ мерзімді инвестициялар үшін басым бағыттардың бірі ретінде қарастырады.
Кездесу барысында тараптар Еуразиялық кеңістіктегі негізгі транзиттік хаб ретіндегі рөлін нығайту тұрғысынан Қазақстанның көлік-логистикалық кешенін дамытудың өзекті мәселелерін талқылады. Транскаспий халықаралық көлік бағдарын қоса алғанда, халықаралық көлік дәліздерін дамытуға ерекше назар аударылды.
Сондай-ақ, тұрақты көлік тізбектерін дамытуға және тасымалдау көлемін ұлғайтуға бағытталған еуропалық әріптестермен ынтымақтастықты кеңейту мүмкіндіктері қарастырылды.
Кездесу қорытындысы бойынша тараптар серіктестікті дамытуға өзара мүдделілігін растады және бірлескен бастамаларды нақты түрде пысықтауды жалғастыруға келісті.