Қазақстанның транзиттік әлеуеті халықаралық деректі фильмде көрсетілді
«Қазақстан теміржолшысы» газетінің тілшісі
«ҚТЖ» ҰК» АҚ мен оның еншілес ұйымы «KTZ Express» АҚ Еуразиядағы негізгі транзиттік тораптардың бірі ретінде халықаралық деректі фильмдер сериясында көрінді.
«Стратегиядан тұрақты дамуға: Еуропа үшін мүмкіндіктер» (From Strategy to Sustainability: Opportunities for Europe) атты деректі фильмде ҚТЖ мен KTZ Express Қазақстанның стратегиялық рөлін таныстыратын ақпарат пен бейнематериалдар ұсынады. Фильмнің тұсаукесері 2026 жылғы 23 маусымда Астанада өткен «Нидерланд – Қазақстан» Іскерлік кеңесінің отырысы аясында өтті.
Деректі фильмдер сериясын Нидерландтың UMION медиаплатформасы Қазақстан Республикасындағы Нидерланд Корольдігі Елшілігінің қолдауымен жүзеге асыруда. Жоба халықаралық аудиторияны Орта дәлізге қатысушы елдердің экономикалық және инфрақұрылымдық дамуымен, инвестициялық мүмкіндіктерімен және халықаралық ынтымақтастық перспективаларымен таныстыруды көздейді. Қазақстан – осы деректі серияда жеке бөлім арналып отырған алғашқы мемлекет.
ҚТЖ мен KTZ Express-тің халықаралық деректі жобаға қатысуы Қазақстанның оң имиджін халықаралық деңгейде нығайтуға, Орта дәліздің жаһандық танымалдылығын арттыруға және еліміздің көлік-логистикалық әлеуетіне шетелдік серіктестер мен инвесторлардың қызығушылығын күшейтуге ықпал етеді.