ҚТЖ-ның өрт сөндіру пойыздары Ақмола және Павлодар облыстарындағы дала өрттерін сөндіруге қатысты
2026 жылғы 15 шілдеде «Қазақстан темір жолы» ҰК» АҚ-ның Ерейментау және Екібастұз станцияларындағы өрт сөндіру пойыздары теміржол инфрақұрылымына жақын аумақта шыққан дала өрттерін сөндіруге жұмылдырылды, деп хабарлайды Rail-news.kz.
Өрт ошақтары Ерейментау – Торғай және Екібастұз-2 – 116-шы айырым бекеті аралықтарында тіркелді. Компанияның өртке қарсы қызметі қызметкерлерінің жедел іс-қимылының арқасында жалынның теміржол инфрақұрылымы нысандарына таралуына жол берілмеді. Өрт дер кезінде толық сөндірілді.
Зардап шеккендер жоқ. Пойыздар қозғалысы қалыпты режимде жүзеге асырылды.
Алдын ала мәлімет бойынша, өрттің шығуына өңірде аптап ыстыққа байланысты жалғасып жатқан дала өрттерінен оттың таралуы себеп болған.
«Қазақстан темір жолы» ҰК» АҚ теміржол инфрақұрылымы нысандарындағы өрт жағдайын тәулік бойы бақылауда ұстап, төтенше жағдайларға жедел әрекет етуге әрдайым дайын.