ҚТЖ Басқарма төрағасы локомотив және жолаушылар паркімен танысты

«Қазақстан темір жолы» ҰК» АҚ Басқарма төрағасы Елжас Отыншиев Астана станциясының техникалық паркіне танысу жұмыс сапарымен барды, деп хабарлайды Rail-news.kz. 

Сапар барысында компания басшысына локомотив паркі мен жолаушылар вагондары паркінің ағымдағы жағдайы туралы баяндалды.

Астана станциясының техникалық паркінде ҚТЖ Басқарма Төрағасына компанияның жылжымалы құрамының өзекті құрылымы таныстырылды. Бүгінгі таңда ҚТЖ жалпы локомотив паркінде 1 813 бірлік бар, оның ішінде: 783 магистральдық тепловоз, 574 магистральдық электровоз, 456 маневрлік тепловоз.

Басқарма төрағасына тартқыш жылжымалы құрамның қазіргі заманғы модельдерінің жарақтандырылуы, техникалық сипаттамалары мен мүмкіндіктері, оның ішінде: ТЭ36А, ТЭ33АС, ТЭП33А, KZ6А, KZ4АТ және СКД6Ѕ модельдері туралы баяндалды. 

Сонымен қатар, компания басшысы жолаушылар вагондары паркімен танысып, жаңа RWS Wagon вагондарын аралап шықты. Жолаушылар вагондарының паркі 2 139 вагонды құрайды, оның ішінде 426 RWS вагоны, 737 «Тұлпар-Тальго» вагоны және 615 басқа типтегі жолаушылар вагондары, соның ішінде ТВЗ, ҚХР және т. б.

Айта кету керек, компанияның стратегиялық міндеті – жолаушылар вагон паркін 2030 жылға дейін 100% жаңарту.