Stadler компаниясы Қазақстандағы жаңа өндіріске 14 миллиард теңгеден астам инвестиция салмақ

Stadler Қазақстанда Орталық Азиядағы алғашқы теміржол көлігіне арналған алюминий кузовтар өндірісін салады, деп хабарлайды Rail-news.kz.

«Stadler Kazakhstan алюминий шанақтарды дәнекерлеу және сырлау цехтарының құрылысына 14 миллиард теңгеден астам инвестиция құйып, Астанадағы өндіріс көлемін кеңейтуде. Бұл – Орталық Азия бойынша теміржол жылжымалы құрамы үшін алюминий шанақтар шығару жолға қойылатын, жоғары деңгейде автоматтандырылған алғашқы кәсіпорын», – делінген таратылған хабарламада.

Жаңа цехтарды іске қосуға дайындық аясында Stadler Kazakhstan жергілікті мамандарды кезең-кезеңімен жұмысқа қабылдап, оларды Stadler-дің Еуропадағы кәсіпорындарында алюминий шанақтарды дәнекерлеу және сырлау технологияларына үйретуде.

Өндірісті оқшаулау бағдарламасы шеңберінде Stadler-дің қазақстандық қызметкерлері Швейцария мен Польшада болып, теміржол арбашаларын, электр сөрелерін және вагон асты жабдықтарын құрастыру бойынша қажетті тәжірибе мен технологияларды меңгеріп үлгерді.

Stadler ұсынған мәліметке сәйкес, жаңа цехтардың ашылуы:

• Кәсіпорынның өндірісті оқшаулау деңгейін арттыруға;
• Қазақстанға және экспорттық жобаларға арналған өнім түрлерін кеңейтуге;
• Жаңа жұмыс орындарын ашуға;
• Қазақстанды Stadler-дің жаһандық жеткізу тізбегіне біріктіруге мүмкіндік береді.

Жаңа цехтар іске қосылғаннан кейін кәсіпорында қосымша 100-ге жуық жаңа жұмыс орны құрылады. Қазіргі таңда онда 650 қызметкер еңбек етуде.