Қоғамдық тәртіп – баршаға ортақ
«Қазақстан теміржолшысы» газетінің тілшісі
Көпшілік орындарда жалпыға ортақ қабылданған моральдық-этикалық нормаларды ұстану – баршаға ортақ міндет. Десек те, соңғы кезде қоғамдық орындарда тәртіп бұзып, соның ішінде ішімдік ішіп алып, көпшіліктің шырқын бұзатындар көбейген.
Жыл басынан бері көліктегі полиция департаментінің қызметкерлері жолаушылар пойыздарынан түрлі әкімшілік құқық бұзушылық жасаған 350 жолаушыны түсірді. Оның ішінде 265 адам алкогольді ішімдік ішіп, қоғамдық орындарға мас күйінде келіп, айналасына қолайсыздық туғызғаны үшін, ал 85 адам ұсақ бұзақылық және басқа да құқық бұзушылықтар жасағаны үшін жауапкершілікке тартылды.
Бұл туралы көліктегі ПД әкімшілік полиция басқармасының бастығы Марат Дубаев мәлімдеді. Кезекті оқиға Алматы – Қостанай бағытындағы жолаушылар пойызында болған. Пойыз бастығының актісі негізінде Отар станциясындағы көліктегі полиция бөлімшесінің қызметкерлері пойыздан екі жолаушыны түсірді.
– Тексеру барысында Алматы облысының 60 және 36 жастағы тұрғындарының алкогольді ішімдік салдарынан қоғамдық жерде адамның қадір-қасиеті мен қоғамдық моральға нұқсан келтіретін жағдай туындатып, балағат сөздер айтып, тәртіпті бұзумен қатар өзге жолаушыларға қолайсыздық туғызғаны анықталды. Құқық бұзушылар полиция бөлімшесіне жеткізіліп, әкімшілік жауапкершілікке тартылды, – деді Марат Дубаев.
Көліктегі полиция департаменті өкілдері жолаушылар пойызы қоғамдық орын екенін және әрбір азамат белгіленген мінез-құлық қағидаларын сақтауға міндетті екенін еске салады.