ЕО Орталық Азия арқылы өтетін көлік дәлізіне €12 млрд-қа дейін инвестиция тартпақ
Еуропалық одақ Орталық Азия мен Оңтүстік Кавказды Еуропа нарығымен тікелей байланыстыратын Орта дәлізді дамытуға €12 млрд-қа дейін мемлекеттік және жеке инвестиция тартуды жоспарлап отыр, деп хабарлайды Rail-news.kz сайты Exclusive.kz-ке сілтеме жасап.
Жаңа халықаралық жоба туралы Еуропалық комиссия төрағасы Урсула фон дер Ляйен 16 қыркүйекте Страсбургте Еуропарламентте Еуропалық одақтың жағдайы туралы жыл сайынғы жолдауында мәлімдеді.
«Бүгін мен көлік байланысын дамытуға бағытталған жаңа халықаралық жоба туралы жариялай аламын. Ол Оңтүстік Кавказ бен Орталық Азияны Еуропа нарығымен тікелей байланыстырады. Біз оны Орта дәліз деп атаймыз», – деді фон дер Ляйен.
Оның айтуынша, инвестицияларды Еуропаның Global Gateway бастамасы аясында тарту жоспарланып отыр. Мемлекеттік және жеке қаржыландырудың жалпы көлемі €12 млрд-қа дейін жетуі мүмкін.
Жобаның мақсаты – көлік бағыттарын әртараптандыру, 2030 жылға қарай сауда ағындарын үш есеге арттыру және жүк тасымалдау мерзімін айтарлықтай қысқарту.
Жобаны жүзеге асыру үшін Еуропалық комиссия Болгария премьер-министрімен бірлесіп, көлік байланысын дамыту мәселелері бойынша өңірлік саммит өткізуді де жоспарлап отыр.
Орта дәліз немесе Транскаспий көлік дәлізі Орталық Азия, Каспий теңізі, Оңтүстік Кавказ арқылы өтіп, одан әрі Еуропаға жалғасады. Қазақстан – осы бағыттың негізгі қатысушыларының бірі.
Бұған дейін Еуропалық комиссия Транскаспий көлік дәлізін дамыту Еуропа мен Азия арасында жүктерді 15 күнге дейінгі мерзімде жеткізуге мүмкіндік беретін заманауи бағыт қалыптастыруы тиіс екенін мәлімдеген.
Global Gateway аясында теміржолдар мен автомобиль жолдарына, порттар мен логистикалық орталықтарға ғана емес, сондай-ақ цифрландыруға, сауда рәсімдерін жеңілдетуге және көлік жүйелерінің өзара үйлесімділігін қамтамасыз етуге инвестиция салу көзделіп отыр.
Еуропалық комиссия бұл бағытты дамытуды Еуропаның Азиямен көлік байланыстарын әртараптандырудың бір жолы ретінде қарастырады.