Техникалық оқу – қауіпсіздік кепілі
Қараша айының 1-і мен 30-ы аралығында Астана станциясында өткен «Техникалық оқуға – ерекше назар» айлығының мақсаты қозғалыс саласы мамандарының білім деңгейі мен біліктілігін арттыру болды.
Шаралар жоспарын жасап, бекіткен станция басшылығынан шұғыл жұмыстар жөніндегі орынбасар Т.Рахымжановқа және логистика жөніндегі орынбасар Д.Керейбаевқа бейнеролик түсіре отырып, «СЦБ және байланыс құралдарының қалыпты жұмысы бұзылған немесе СЦБ құрылғыларынан ақау табылған стандартты емес жағдайдағы станция қызметкерлерінің әрекеті» және «Қауіпті жүктер бір жерден ағып тұрған жағдайдағы қызметкерлердің әрекеті» деген тақырыптарда практикалық сабақ өткізу жүктелді. Ол үшін басшы құрамға техникалық кабинетте көрнекі құралдар үшін оқытатын немесе ақпараттық стенділер дайындау тапсырылды. Цех басшылары айлық аясында бір жылдан кем еңбек өтілі бар алғашқы қыстаушылармен еңбекте қауіпсіз тәсілдерді қолдану бойынша викторина түріндегі байқау ұйымдастырды. Айлық барысында жұмыс киімі мен аяқ киімінің макеті көрсетілді. Қызметкерлерінің білімін нығайта отырып, теміржолдағы қауіпсіздікті күшейтуге атсалысып отырған ұжымда бұл шараға барлығы 96 адам қатысты. Сабақтар кезіндегі бейнероликтерді кезекшілік аппарат өздері түсіріп, стандартты емес жағдайлар кезіндегі қызметкерлердің әрекетін көрсетті. Бір сөзбен айтқанда, айлық нәтижелі өтті деуге болады.
Сонымен қатар қауіпсіздікті басты назарда ұстайтын қозғалысшылар желтоқсан айындағы шараларын рейдпен бастады. Бұл әдеттегідей аса қауіпті аймақ саналатын темір жол бойында бөгде адамдардың жүрмеуі, белгіленбеген жерден кесіп өтпеуге қатысты шара болды. Жолды кез келген жерден кесіп өткен 13 адаммен түсініктеме жүргізілді. Оларға темір жолмен өту ережелері жазылған жадынамалар мен брошюралар үлестірілді. Мұндай рейд екінші рет осы айдың 26-да тағы да өткізілмек.
Нұрай СӘРСЕНҒАЛИ