Атырау жүк тасымалы бөлімшесінде үздік станция басшылары анықталды
«Қазақстан темір жолы» ҰК» АҚ бойынша 2018 жыл «Станция бастығы» жылы болып жарияланғаны белгілі. Атырау жүк тасымалы бөлімшесінде осы шараға орай станция басшылары арасында байқау жарияланып, нәтижесінде үздіктер анықталды.
Байқау бойынша станция басшыларының еңбек нәтижелерімен қатар темір жолдағы техникалық пайдалану Ережесін, пойыздар қозғалысы мен маневрлік жұмыстар бойынша Нұсқаулықты, сигнализация бойынша Нұсқаулықты және Компаниядағы өндірістік қауіпсіздік стандарттарын қаншалықты білу деңгейлері ауызша сұрау арқылы тексерілді. Арнайы жасақталған әдістемеге сәйкес станция бастығының кәсіби шеберлігі мен жауапкершілігін көтеруге бағалау жүргізілді.
Бөлімшенің қауіпсіздік жөніндегі инженері Фарида Қазжанованың айтуынша, байқауға бөлімшеге қарасты 10 станция мен 8 разъезд басшылары қатысып, осылардың ішінен «Үздік станция бастығы» атағына лайық жоғары ұпай жинаған үш басшы таңдап алынды. Бірінші орынды Теңдік станциясының бастығы Болатбек Меңдешов, екінші орынды Құлсары станциясының бастығы Қайрат Жақсылықов, ал үшінші орынды Аққыстау станциясының бастығы Гүлнар Көшкенбаева иеленді. Бұл үшеуі де бүгінде толық қуатымен жұмыс жасап келе жатқан станциялар. Теңдік станциясы негізінен Атырау мұнай өңдеу зауытымен, Құлсары станциясы «Теңізшевройл» мұнай компаниясымен, ал Аққыстау станциясы «Жайықмұнайгаз» мұнайгаз өндіру басқармасымен тығыз қарым-қатынаста. Яғни, үшеуі де мұнай өнімдерін тасымалдауда үлкен орыны бар станциялар. Басшылары да жан-жақты ысылған, білікті, тәжірибелі мамандар. Жеңімпаздарға бөлімше атынан Мадақтама қағазы беріліп, байқаудың қорытынды нәтижесі Астанадағы басшылыққа ұсынылды.
Қосұйым Мұқашев, Атырау