Күн электр станциясы іске қосылады

Шымкент темір жолының Сарыағаш станциясына таяу Жылға елді мекенінде 42 гектар жерді алып жатқан қуаттылығы 20 МВт құрайтын күн электр станциясының құрылысы аяқталуда. Болашақ энергиясы темір жол мен елді мекендерді де жарықпен қамтамасыз етеді деп күтілуде.    

Күн сәулесі – сарқылмас энергия көзі. Күн энергиясының маңызды артықшылықтарының бірі оның қоршаған ортаға қауіпсіздігі және арнайы жеткізу құралдарының қажет еместігі болып табылады. Сондықтан тиімді де пайдалы һәм арзан энергия көзін жыл он екі ай күн сәулесі төгіп тұратын оңтүстікте неге пайдаланбасқа? Бұл істі алғашқылар қатарында теміржолшылар қолға алды.

Жобаны қазақстандық «EcoProTech-Astana» компаниясы германиялық «DERA GmbH» компаниясымен бірлесіп жүзеге асыруда. Тартылған инвестиция көлемі – $35 млн. Күн электр станциясының құрылысы аясында 77 мыңнан астам фотоэлектрлік модульдер, 10 инвертор мен трансформатор, сондай-ақ 10 таратушы құрылғы орнатылуы көзделген. «Жасыл» энергия көздерінен өндірілген электр энергиясы «KEGOC»-қа жеткізіледі. Жобаны жүзеге асыру аясында 20 жұмыс орны ашылады.

Қазіргі уақытта құрылыс алаңында модульдерге арналған металл конструкциялар салынған. Осы ақпан айында күн батареялары мен трансформаторлар блогы орнатылады. Ал электр станциясының іске қосылуы наурыз айына жоспарланған.

Жобаны жүзеге асыруға «Түркістан» ƏКК» АҚ филиалы – «TURKISTAN INVEST» қаржылық көмек көрсетуде. Өз кезегінде Жылға шағын станциясында салынып жатқан күн электр жобасы Шымкент электрмен жабдықтау дистанциясының жүгін жеңілдетіп, жұмысын жақсарта түседі деп болжанып отыр.

Жансая СЫДЫҚБАЙ, Түркістан облысы