Теміржолшылар жағдайымен танысты
Өткен аптада «ҚТЖ» ҰК» АҚ-ның HR жөніндегі басқарушы директоры - персоналды басқару қызметінің басшысы Тамила Микулич бірқатар теміржол мекемелеріндегі өндірістік жұмыс орындарын аралап, жұмысшылардың жағдайымен танысты.
Алдымен Ірілендірілген Астана жол дистанциясына барған ҚТЖ-ның персонал басшысы жолшылардың күнделікті жұмысымен, еңбек жағдайымен танысып, дефектоскопия цехын аралады. «Авикон-15 ақаутапқышы» жұмысымен танысты. Сонымен қатар дистанцияның операторы Б.Қасымғалиев лента шифрын айырып оқу туралы мәлімет берді. Ал механикалық цехта «СМ-7» қар тазалау машинасының жұмысы мен «МПТ-0014» дрезинасының қызметі туралы бас механик Б.Беркенов толық ақпарат берді. 4-ші өндірістік телімде №64 бағыттама бұрмасын ағымдық күтіп ұстау бойынша өндірістік-техникалық «толаскез» жариялау реті түсіндірілді. Осы жұмыстардың бәрінде теміржолшылардың қатысуы, еңбек қауіпсіздігінің сақталуы басқарушы директор бастаған топ назарынан тыс қалмады.
Бұдан кейін Астана локомотив пайдалану депосына барған топ локомотив бригадаларының демалыс үйін аралап көрді. Мұнда да локомотив бригадаларының демалыс жағдайы, еңбек тәртібіне баса назар аударылды. Сондай-ақ локомотивтердің қауіпсіздігін, сумен және құммен, отынмен жабдықталуын да сүзгіден өткізді. Локомотив бригадаларының рейс алды дайындық процестері де назардан тыс қалмады. Әсіресе, пойыздардың қозғалыс қауіпсіздігі материалдары бойынша рейс алды нұсқаулық өткізуге, рейс алдында медициналық тексерудің жүргізілуіне, локомотив бригадаларының локомотивті қабылдап алу процесіне жіті назар аударылды.
Ұлан ОРАЗ