Техникалық ревизия өтуде
Астана дабыл беру және байланыс дистанциясында биыл наурыздың 26-нан бастап магистральдық желі бөлімшесі комиссиясының қатысуымен техникалық ревизия өтуде.
Әзірге тексеру құрамы Ерейментау және Жалтыр телімдерін басты назарға алған. Дистанцияның қауіпсіздік бойынша бас маманы Әділ Жұлдызбаевтың айтуынша, ревизия барысында жолдың бойы, бұрмалар, өткелдер толықтай қаралуда. Сонымен қатар су тасқынына қарсы жұмыстар бойынша қатаң бақылау, қадағалау орнатылған. Көктемгі ауа-райының құбылмалылығына байланысты теміржолшылар сәуір айының аяғына дейін күн сайын ревизия, тексеру жүргізуден жаңылмайды. Бұл – теміржол сынды қауіпті аймақта жылда әдеттегідей жасалатын қалыпты тексеру жұмыстары.
– Жалпы техникалық ревизия екі-үш жылда бір болып тұрады. Әр дистанцияда бөлек-бөлек өтеді. Магистральдық желі бөлімшесінен және байланыс бойынша департаменттерден тексеруге өкілдер келеді. Бұл техникалық ревизия барысында бәрі қамтылады. Толық аудит өтеді, – дейді бас маман.
Нұрай СӘРСЕНҒАЛИ