Шу аудандық соты үкім шығарды

Өткен жылдың маусым айында Астана-Алматы бағытындағы №9 «Бәйтерек» жолаушылар пойызының 6 вагоны рельстен шығып, ал 3 вагоны аударылып, төтенше жағдай орын алғаны көпшіліктің есінде болар.

«Шығанақ - Шу» учаскесінің «Жиделі - Бірлік-1» аралығында болған апат салдарынан 1 адам қаза тауып, бірнеше жолаушы Шу қаласындағы орталық ауруханаға жеткізілген еді. Жуырда осы апатқа байланысты Шу аудандық соты үкім шығарды. Аудандық соттың шешімі бойынша «Темір жол қауіпсіздігі қағидаларын бұзды» деген айыппен Шу жол дистанциясы бастығының орынбасары 3 жыл 6 айға және апат орын алған 2-ші учаскенің бастығы мен оның орынбасары 2 жылға бас бостандықтарынан айырылды. Айта кету керек, сот процесі ұзаққа созылды. Осы аралықта 700 адамнан жауап алынып, 25 заңды және жеке тұлға жәбірленуші деп танылыпты. Алайда, жапа шегушілердің тек екеуінің ғана өтініші қанағаттандырылған.

Ал, қайғылы оқиғадан қайтыс болған 12 жастағы жасөспірімнің туыстарына сотталушылар моральдық және материалдық шығын есебінде 3,5 миллион теңге беретін болды. Сонымен қатар, апат салдарынан аяғын жарақаттап алған екінші жәбірленушіге «Жолаушылар тасымалы» АҚ 500 мың теңге көлемінде қаржы беруге міндеттелді. Бірақ, сотталушылар соттың үкімімен келіспей отыр. Сол себепті апелляциялық шағым түсірмек.

Динара БАТЫРХАИРОВА