Ақтау порты арқылы тестілік ауыстырып тиеуді бастады
MSC контейнерлерінің әлемдік тасымалдаушысы Ақтау порты арқылы тестілік ауыстырып тиеуді бастады. Осылайша тұрақты жұмыс істейтін фидерлік кеме Бакуден (Әзербайжан) Ақтау портына әлемдегі ең ірі теңіз контейнерлік тасымалдаушысының алғашқы тестілік контейнерлерін жеткізді.
Бұл оқиға болашағы зор және жемісті ынтымақтастықтың басталуының дәлелі болды. DP World компаниясының өкілі, Ақтау портының коммерция жөніндегі басқарушысы Мартин Воетман бұл порт мүмкіндіктерін контейнерлік тасымалдау арнасына қайта бағдарлауға бағытталған бірлескен күш-жігердің маңызды нәтижесі екенін атап өтті.
Жақын болашақта порт арқылы тиелетін MSC компаниясының контейнерлерінің саны жылына 10 мыңға дейін артуы мүмкін.
Мамандардың айтуынша, қазіргі уақытта Ақтау портының қуаты 40 мың контейнерді қабылдап, өңдеуге мүмкіндік береді, бірақ стратегиялық міндеттер әлдеқайда жоғары – шамамен 100 мың. Мұндай жағдайда ірі әлемдік компанияны өзінің контейнерлер паркімен ынтымақтастыққа тарту портқа контейнерлік жүктерді ауыстырып тиеу көлемін ұлғайтуға және өзінің өндірістік қуаттарының халықаралық стандарттарға сәйкестігін растауға жақсы мүмкіндік береді.