Электрондық дерек алмасу жетілдіреді

Өзбекстан теміржолшылары қазақстандық электрондық деректер алмасу жүйесіне қызығушылық танытуда.

Елордада Қазақстанның және Өзбекстанның теміржолшылары экспорттық және импорттық деректерге қатысты электрондық алмасу саласында ынтымақтастықты кеңейту және тереңдету, сондай-ақ, шекара арқылы өтетін жүктер туралы алдын ала ақпарат бойынша ертеректе қол жеткізілген келісімдерді орындау мәселелерін талқылады.

«Узбекистон темір йуллари» АҚ өкілдеріне республикаішілік қатынаста жүктерді вагондармен, контейнерлермен, топтық және маршруттық жөнелтілімдермен тасымалдау кезінде қағазсыз технологияны енгізу, жүктерді Ресейден Қазақстанға және кері тасымалдау бөлігінде Шарттық және коммерциялық жұмысты басқарудың автоматтандырылған жүйесінің (АБЖ) функционалдық мүмкіндіктері көрсетілді.

«Біз ынтымақтастыққа қашанда ашықпыз, өз тәжірибелерімізбен әріптестерімізбен бөлісуге дайынбыз. Біздің бірлескен күш-қуатымыз деректерді электрондық алмасудың қолданыстағы жүйесін жетілдіруге, қағазбен іске асырылатын құжат айналымын төмендетуге, сондай-ақ, Қазақстан және Өзбекстан аумағы бойынша жүктерді тасымалдау және жөнелтудің тиімді үдерісін және ашықтығын қамтамасыз етуге бағытталып отыр», – деді «ҚТЖ-Жүк тасымалы» АҚ бас директоры орынбасарының міндетін атқарушы Мұхтар Махамбет.

Кездесу нәтижесі бойынша екі елдің теміржолшылары Сарыағаш және Қарақалпақстан мемлекетаралық түйіспе пункттері арқылы Қазақстан және Өзбекстан аумағына тасымалданатын жүктерге ілеспе құжаттардың электрондық алмасу жүйесін жетілдіру саласында тығыз ынтымақтастықты жалғастыруға сөз байласты. Бұл бастаманың жүзеге асуы әртүрлі рұқсатнама процедураларынан өту уақытын едәуір қысқартып, транзиттік тасымалдың өсу динамикасына оң ықпалын тигізбек.