Жолаушылар вагондарының жазғы маусымға дайындығы қандай?
Жақында «Жолаушылар тасымалы» АҚ-ның ұйымдастыруымен жолаушылар вагондарының жазғы маусымға дайындығы мәселесі қарастырылған дөңгелек үстел өтті.
Ұлттық тасымалдаушы компания жолаушыларды тасымалдайтындықтан вагондардың тазалығы мен зиянкестерден ада болуын бірінші орынға қойып отыр. Бір рейс кезінде жолаушылар пойыздарының құрамы 1000 км-ден астам жол жүреді. Осы уақыт аралығында пойыздардың сырты әбден ластанып, көркі келіспей қалуы мүмкін. Ұзақ жол жүру кезінде пойыздардың вагон шанақтарына тежегіш қалыптардың үйкелуінен шаң жабысады, сонымен қатар тепловоз тартқышындағы отынның жануынан пайда болатын түзінділер басады, одан басқа жолдың шаңы тағы бар. Сондықтан әрбір рейс алдында арнайы жуу құралдарымен вагондардың іші-сырты жуылады.
«Вагонсервис» АҚ вице-президенті Данияр Нұрекешовтің айтуынша, вагондардың сыртын жууға мына қызметтер кіреді, яғни шанақтарды жуу, терезе әйнектерін тазалау, баспалдақтар мен тұтқалар тазалығы. «Тұлпар-Тальго» вагондарына Нұр-Сұлтан және Алматы қалаларында орналасқан арнайы техникалық қызмет көрсету қосынында ішкі тазалау жұмыстары жасалады. Одан бөлек Алматы мен Ақтөбе қалаларында вагон жуу кешендері жұмыс істейді. Оларда жыл бойына стандартты жолаушылар вагондары шанақтарының сыртын жуу жұмыстары жүргізіледі.
Күн сайын мыңдаған адамды тасымалдайтындықтан темір жол көлігінде де басқа да қоғамдық орындар секілді түрлі зиянды жәндіктер, кеміргіш зиянкестер, жәндіктердің көбейіп кету қаупі жоғары. Сондықтан «Жолаушылар тасымалы» АҚ дер кезінде және толық көлемде дезинфекция, дезинсекция, дератизация сияқты залалсыздандыру жұмыстарын жүргізіп отырады.