Көмір өндіру оң нәтиже беруде
Бүгінгі таңда Қазақстандағы көмір өндіру саласын ұлғайту және көмір компанияларының әлеуетін арттыруда айтарлықтай оң нәтижелерге қол жеткізілуде.
2018 жылы еліміздің көмір өндіру компаниялары 113,7 млн тонна қатты отын өндірген болатын. Бұл алдыңғы жылмен салыстырғанда 5,4 пайызға көп екен.
Сонымен қатар кәсіпорындарды жаңғырту есебімен де өндірістердің көрсеткіштері жоғарылауда. Мәселен, «Шығыс» көмір өндіру бөлігінде №2 циклды-тасқынды аршымалы кешен технологиясы іске қосылды. Бұл аршыма тау жыныстарын игеру көлемін арттыруға мүмкіндік берді. Көмір өндірісінің бүгінгі бағамы мен болашағы туралы күні кеше елімізде тұңғыш рет ұйымдастырылған форумда сөз болды.
– «Жасыл экономикаға» көшу аясында электр энергетикасында таңдалған генерацияны әртараптандыру бағамы 2030 жылға дейін энергияның негізгі көзі ретінде көмір генерациясын сақтауға септік етеді, – деді онда сөйлеген сөзінде ҚР Индустрия және инфрақұрылымдық даму министрі Роман Скляр.
Роман Скляр сонымен қатар әлемдік трендтерді ескере келе, көмір химиясы мен көмірді қайта терең кешенді өңдеуді дамыту қажеттілігіне тоқталды. Бұл бағыт көмір өнімінің тұтынушылық ерекшеліктерін сапалы өзгертуді, ең бастысы – энергетикалық көмір нарығынан тыс шығуға мүмкіндік береді.