Аман Ілиясов - «Үздік маман» атануға лайық

Өндірістік мамандықтарды ынталандыру мен насихаттау үшін «Самұрық-Қазына» АҚ биыл да дәстүрлі түрде «Үздік маман» байқауын бастағалы теміржолшылар да елеңдеулі. «ҚТЖ» ҰК» АҚ-на қарасты бірқатар мекеме қызметкерлері аталмыш байқауда бақ сынап жатыр.

Теміржолшылар үкілеп бәйгеге қосқандар қатарында «Вагонсервис» АҚ-ның жолаушы вагондарын жөндеу жөніндегі Батыс филиалының бақылаушысы Аман Ілиясов та бар. Оңай адам үздік атана ма?! «Үздік маман» байқауына есімі ұсынылған теміржолшылардың бәрі он жылдық еңбек өтілі бар, әріптестеріне сыйлы, тапсырылған істі тиянақты орындайтын білікті мамандар екені белгілі.

Әр күнін вагондарды техникалық тексеріс паркінде өткізетін Аман Ілиясов та басшылық ұсынысымен байқауға өтініш берген. Әке жолымен теміржолшы мамандығын таңдаған ол – қызметіне жауапты, әріптестеріне сыйлы мамандардың бірі. Еңбек жолын 2007 жылы «Вагонсервис» АҚның жолаушы вагондарын жөндеу жөніндегі Батыс филиалына слесарь болып кірген жігіт өміріне азық болған кәсіпте әке көрсеткен бағытты таңдағанына еш өкінген емес. Мамандығын мақтан тұтады.

«Әкем Оран Ілиясов өз ісінің шебері еді. Бала күнімде жиі жұмысына ертіп баратын. Қазір жұмыс жасап жүрген еңбекқор ұжыммен бала күннен таныспын. Қызметкерлер мен басшылық арасындағы қарапайым қарымқатынас, байланыстың куәсі болып өстім. Теміржолшы болуды ойланбастан таңдадым. Әкем әрдайым «Кім болып жұмыс жасағаның емес, оны қалай жасағаның маңызды» деп жиі айтатын. Әкемдей болғым келді. Мектеп бітірген соң бірден слесарь болып жұмысқа қабылдандым. Кейін Ақтөбе көлік, коммуникация және технологиялар колледжінде білім алып, бақылаушы қызметіне ауыстым. Мен өз жұмысымды және ұйымшыл әріптестерімді жақсы көремін. Ең бастысы – ел экономика сын дамытушы алпауыт компанияда еңбек ете жүріп, Қазақстанның дамуына менің де үлес қоса алатынымды мақтан тұтамын», – дейді Аман Ілиясов.

Бақылаушы – техникалық цехтағы маңызды және жауапты жұмыс. Ол дәрігер секілді дөңгелектер мен тежегіштерден бастап вагонның барлық бөлшектерін тексеріп, ақауларды анықтауы керек. Олар жолаушылардың өмірі мен тасымалданатын жүктің сақталуы үшін жауап береді. Осындай жауапты істің шебері бүгінде байқауда бақ сынап жатыр. Байқау онлайн дауыс беру арқылы өтетіндіктен Аман әріптестерінің қодауын күтеді. Әр дауыс маңызды. Ендеше әріптесті қолдайық,теміржолшылар!